Fransanın ifrat sağçı lideri Marin Le Pen bazar ertəsi günü Avropa Parlamentində saxta iş qalmaqalı ilə bağlı məhkəmə prosesində iştirak edəcək. Veriləcək qərara əsasən, o, 2027-ci ildə prezidentliyə namizədlik fürsətini itirə bilər.
Üç dəfə prezident seçkilərində iştirak etmiş Le Pen, 2027-ci ildə Fransa prezidenti olmaq ehtimalının həmişəkindən daha yüksək olduğunu düşünür və ona qarşı irəli sürülən ittihamları qətiyyətlə rədd edir. Lakin prokurorlar məhkəmədən, Milli Birlik (RN) nümayəndələri və digər yüksək vəzifəli şəxslər də daxil olmaqla, Le Penə həbs cəzası verilməsini və dövlət vəzifəsi tutmasının qadağan edilməsini istəyib.
Əgər məhkəmə tələbi qəbul edərsə, onun dövlət vəzifəsində işləməsinə qoyulacaq qadağa apellyasiyaya şikayət edilsə belə, nəticə dəyişməyəcək və Le Pen 2027-ci il seçkilərində iştirak edə bilməyəcək.
2024-cü il qanunvericilik seçkilərində parlamentdəki ən böyük partiya olan RN, Le Pen ilə birlikdə immiqrasiya siyasəti və yaşayış xərclərinin yüksəkliyi məsələlərinə dair ictimai dəstək qazanaraq 2027-ci ildə Yelisey Sarayına girməyi planlaşdırırdı.
Keçən il etimadsızlıq səsverməsi ilə o vaxtkı Baş nazir Mişel Barnierin hökumətini devirməklə siyasi gücünü möhkəmləndirən Le Pen mümkün məhkumluq halında RN lideri Jordan Bardella ilə əvəz oluna bilər. Lakin hələ 29 yaşı olan Bardellanın prezidentlik kampaniyası üçün kifayət qədər təcrübəyə malik olub-olmaması ilə bağlı partiya daxilində də şübhələr mövcuddur.
Le Pen, 2011-ci ildə atası Jean-Marie Le Pen tərəfindən qurulan və ifrat sağa çevrilən Milli Cəbhə (FN) partiyasının rəhbərliyini ələ keçirəndən sonra, partiyanı siyasi gücə yüksəltmək və atasının mirasını silmək üçün islahatlar aparıb. Sonradan partiya adını Milli Birlik (RN) olaraq dəyişib.
Le Penlə yanaşı, onun partiyası RN də məhkəmə qarşısındadır. Prokurorlar partiyaya qarşı
ümumilikdə 4,6 milyon dollar cərimə tələb edib. Ancaq bu cəzanın təxminən yarısının təxirə
salınmasını məsləhət görüb.
Prosesdə 9-u Avropa Parlamentinin keçmiş deputatı və 12-si deputat köməkçisi olmaqla
ümumilikdə 24 nəfər mühakimə olunur.
Prokurorluq Le Penə 5 il həbs cəzası verilməsini, bu cəzanın 3 ilinin təxirə salınmasını, qalan
iki ilinin isə həbsxanada deyil, elektron qolbaqla ev dustaqlığında keçirilməsini istəyib. Prokurorluq həmçinin 300 min avro (324 min dollar) məbləğində cərimə və 5 il dövlət vəzifəsində işləmək qadağası tələb edib.
