Beynəlxalq Cinayət Polisi Təşkilatı (İnterpol) Bosniyalı serb lider Milorad Dodik və Serb Respublikası (RS) parlamentinin sədri Nenad Stevandiçin həbsinə order verib. Bu barədə Serbiyanın “Politika” qəzeti məlumat yayıb.

İnterpolun Sarayevodakı ofisinin təşəbbüsü ilə verilən həbs orderləri, Bosniya və Herseqovina Cinayət Məcəlləsinin 156-cı maddəsi ilə konstitusiya quruluşunu pozma ittihamlarına əsaslanır. “Politika” qəzetinin məlumatına görə, sərəncamlar İnterpola üzv olan bütün dövlətlərə göndərilib, lakin hüquqi yoxlama prosesi hələ də davam edir.

Milorad Dodik bu yaxınlarda NATO-nun Müttəfiq Qüvvələrinin əməliyyatının 26-cı ildönümünə həsr olunmuş tədbirdə iştirak etmək üçün Serbiyaya səfər edib.

Martın 26-da Bosniya və Herseqovina Sərhəd Polisi Milorad Dodik barəsində aktiv həbs qərarı olmasına baxmayaraq, onun Serbiyaya necə keçdiyi ilə bağlı istintaqa başlayıb. Həmçinin, Milorad Dodikin həmin gün Serbiyadan İsrailə keçdiyi bildirilir.