Cənubi Koreya ordusu, Şimali Koreyanın bu il Rusiyaya əlavə 3000 hərbçi göndərdiyini və Moskvanın Kiyevə qarşı müharibəsini dəstəkləmək üçün raket, artilleriya və sursat tədarükünü davam etdirdiyini iddia edib.
Cənubi Koreyanın Birləşmiş Qərargah Rəisləri (JCS) cümə axşamı verdiyi açıqlamada bu ifadələrə yer verib: "Yanvar-fevral ayları arasında əlavə 3000 əsgərin göndərildiyi təxmin edilir".
Bəyanatda, Rusiyaya daha əvvəl göndərilən 11.000 Şimali Koreya əsgərindən 4000-nin öldüyü və ya yaralandığı iddia edilib.
"Şimali Koreya raketlər, artilleriya avadanlığı və döyüş sursatları göndərməyə davam edir", - deyə bəyanatda qeyd olunub.
Məlumata görə, Şimali Koreya indiyədək Rusiyaya əhəmiyyətli sayda qısa mənzilli ballistik raketlər (SRBM), 220-yə yaxın 170 mm-lik özüyeriyən haubitsa və 240 mm-lik reaktiv yaylım atəşi sistemləri tədarük edib.
"Bu rəqəmlər döyüş meydanındakı vəziyyətdən asılı olaraq arta bilər", - deyə JCS xəbərdarlıq edib.
Qeyd edək ki, Moskvanın 2022-ci ildə Ukraynaya hücumundan sonra Rusiya və Şimali Koreya ənənəvi müttəfiqliklərini daha da gücləndiriblər. Seul Şimali Koreya lideri Kim Çen Inın Moskvaya minlərlə əsgər və silah konteynerləri göndərdiyini iddia edir.
Moskva və Pxenyan qoşunların yerləşdirilməsi ilə bağlı rəsmi açıqlama verməsələr də, iki ölkə Rusiya Prezidenti Vladimir Putinin keçən il Şimali Koreyaya səfəri zamanı hərtərəfli hərbi saziş imzalayıb.
Şimali Koreya media orqanları Kim Çen Inın yeni intihar və kəşfiyyat dronlarının sınaqlarına nəzarət etdiyini açıqlayıb.
Koreya Mərkəzi Xəbər Agentliyi (KCNA) bildirib ki, yeni strateji kəşfiyyat dronları müxtəlif strateji hədəfləri və düşmən qoşunlarının qurudakı və dənizdəki fəaliyyətlərini izləyə bilir.
Agentliyin məlumatına görə, intiharçı dronların müxtəlif taktiki zərbə missiyaları üçün istifadə edilə bilən zərbə qabiliyyətinə malik olduğu da sübuta yetirilib.
Kim Çen In yeni süni intellekt texnologiyası ilə hazırlanmış strateji dronların performansını qiymətləndirdi. Koreya Mərkəzi Xəbər Agentliyinin məlumatına görə, Kim Çen In həmçinin istehsal potensialının genişləndirilməsi planını təsdiqləyib.
