ABŞ-ın məxfi kəşfiyyat orqanlarından biri olan Milli Təhlükəsizlik Agentliyinin (MTA) direktoru və onun müavini cümə axşamı vəzifəsindən azad edilib. Qərar Amerika mediasında geniş işıqlandırılıb.

“Washington Post” adı açıqlanmayan ABŞ rəsmilərinə istinadən yaydığı məlumatda general Timoti Honun vəzifəyə gəldikdən qısa müddət sonra vəzifəsindən azad edildiyini bildirib. Məlumatda Honun niyə vəzifədən kənarlaşdırıldığı barədə ətraflı məlumat verilmir.

Timoti Hon həm də ABŞ Müdafiə Nazirliyinin kiber əməliyyatlara cavabdeh olan ABŞ Kiber Komandanlığının rəhbəri idi. Bu agentlik həm müdafiə, həm də hücum məqsədilə kiber əməliyyatlar həyata keçirir.

T.Honun müavini Vendi Noblun da vəzifəsindən azad edildiyi və Pentaqonda başqa bir vəzifəyə təyin edildiyi bildirilir.

Milli Təhlükəsizlik Agentliyi ABŞ hökumətinin ən böyük və ən gizli siqnal kəşfiyyatı agentliyi kimi tanınır.

Pentaqon hələ ki, AFP-nin şərh tələbinə cavab verməyib.

2024-cü ilin fevralında bu vəzifəyə təyin edilmiş general Timoti Hon əvvəllər Kiber Milli Missiya Qüvvələrinin komandanlığı da daxil olmaqla, bir sıra mühüm kibertəhlükəsizlik vəzifələrində çalışıb.

Demokrat konqresmen Cim Himes işdən çıxarılmalara sərt reaksiya verib. “Mən General Honu milli təhlükəsizliyi ön planda tutan dürüst bir lider kimi tanıyıram” – deyə Cim Himes vurğulayıb.

Qeyd edək ki, fevral ayında Birləşmiş Qərargah Rəisləri Komitəsinin sədri general Çarlz “CQ” Braun da səbəbsiz olaraq vəzifəsindən azad edilmişdi. Tramp administrasiyası həmçinin federal işçilərinin kütləvi şəkildə ixtisar edilməsi və dövlət qurumlarının səlahiyyətlərinin azaldılması üçün genişmiqyaslı addımlar atır.

“Washington Post” ABŞ Kiber Komandanlığının direktor müavini Uilyam J. Hartman və NSA-nın icraçı direktoru Şeyla Tomasın müvəqqəti MTA direktoru və direktor müavini təyin edildiklərini açıqlayıb.