ABŞ prezidenti Donald Trampın elan etdiyi rüsumlar bütün dünyada sərt reaksiya ilə qarşılanıb. Ticarət müharibəsini daha da böyütmək riski daşıyan bu addıma cavab olaraq ABŞ Maliyyə Nazirliyi ölkələri qisas almamağa çağırıb.
Kanadanın baş naziri Mark Karni çərşənbə günü Trampın tariflərinə cavab verəcəklərini bildirib. "Məqsədimiz aydın və qətiyyətli addımlar atmaqdır. Biz də bunu edəcəyik", - deyən Mark Karni Nazirlər Kabinetinin iclasından əvvəl Kanadanın cavabını müzakirə edəcəklərini söyləyib.
Meksika prezidenti Klaudia Şeinbaum Trampın açıqlamasının ölkəsinə necə təsir edəcəyini görmək üçün gözləyəcəyini bildirib. Şeinbaum iqtisadi maraqlarını ön planda tutduqlarını ifadə edib.
Çin isə öz növbəsində, Trampın tariflərinə qarşı olduğunu açıq şəkildə bildirdi və qanuni hüquqlarını qorumaq üçün əks tədbirlər görəcəyini elan etdi. Çinin Ticarət Nazirliyi tariflərin beynəlxalq ticarət qaydalarını pozduğunu və qlobal iqtisadi inkişafı təhdid etdiyini bildirib. Bəyanatda deyilir: "Amerika Birləşmiş Ştatları bu birtərəfli addımından dərhal imtina etməlidir".
Braziliya Məclisi icra hakimiyyətinə ticarət maneələrinə cavab vermək səlahiyyəti verən qanunu təsdiqləyib.
Trampa yaxınlığı ilə tanınan İtaliyanın baş naziri Corcia Meloni tariflərin yanlış olduğunu bildirib. "Bu ABŞ-ın xeyrinə olmayacaq. Ticarət müharibəsindən qaçmaq üçün ABŞ-la razılaşma əldə etmək üçün əlimizdən gələni edəcəyik", - deyə Corcia Meloni vurğulayıb. Meloni İtaliyanın maraqlarına uyğun olaraq Avropadakı digər tərəfdaşlarla danışıqlar aparacaqlarını da qeyd edib.
Cənubi Koreyanın müvəqqəti prezidenti Han Duk Su Sənaye Nazirliyinə tariflərin təsirini azaltmaq üçün Vaşinqtonla aktiv danışıqlar aparmağı tapşırıb.
ABŞ maliyyə naziri Skot Bessent Fox News-a müsahibəsində bildirib ki, ölkələr qisas almamalıdır, çünki bu, yeni gərginliyə səbəb olacaq.
Avropa Parlamentinin Beynəlxalq Ticarət Komitəsinin sədri Bernd Lanq Trampın Aİ-dən idxal olunan məhsullara 20 faizlik gömrük rüsumunun tətbiqi qərarını sərt şəkildə tənqid edib.
Yaponiyanın ticarət naziri Yoji Muto ABŞ-ın Yaponiyadan idxala tətbiq etdiyi 24 faizlik gömrük rüsumunun təəssüf doğurduğunu bildirib və Vaşinqtonu geri addım atmağa çağırıb.
Avstraliyanın baş naziri Entoni Albanese ölkəsinə tətbiq edilən rüsumların tamamilə ədalətsiz olduğunu bildirib. Hindistanda keçirilən biznes forumda çıxış edən Çili prezidenti Qabriel Borik isə bu cür tədbirlərin qeyri-müəyyənlik yaratdığını və beynəlxalq ticarəti tənzimləyən prinsipləri pozduğunu qeyd edib.
Bəzi ölkələr isə Trampın tarifləri ilə bağlı daha ehtiyatlı olmağı seçiblər.
Böyük Britaniya ümid edir ki, ABŞ ilə iqtisadi razılaşma 10%-lik tarifin təsirini yüngülləşdirəcək. Ticarət naziri Conatan Reynolds deyib: "Biz soyuqqanlı və qətiyyətli olacağıq."
Almaniya Kimya Sənayesi Assosiasiyası isə Aİ-ni soyuqqanlı olmağa çağırıb və artan ticarət müharibəsinin Avropa iqtisadiyyatına zərər verəcəyini bildirib. Bəyanatda deyilir: "Almaniya ticarət müharibəsində piyada olmamalıdır."
Yeni Zelandiyanın ticarət naziri Todd McClay də ABŞ-ın tariflərinə qarşı çıxış edərək, iddia edilən vergi səviyyəsinin reallığı əks etdirmədiyini qeyd edib. "Biz çox aşağı tariflər tətbiq edən bir ölkəyik. 20 faiz deyil, ABŞ-ın güman etdiyi 10 faizdən aşağı", - deyən McClay cavab tədbirlərinin ölkə daxilində qiymətləri artıracağını və inflyasiyaya səbəb olacağını vurğuladı.
