Qətər, Misir və digər vasitəçilərin Qəzzada atəşkəsin təmin olunması üçün "Həmas" ilə İsrail arasında aparılan danışıqları pozmaq məqsədilə pul ödədiyinə dair yayılan iddiaları təkzib edib.

“Qətər dövləti bəzi jurnalistlər və media orqanlarının Qətərin Misirin və ya danışıqlarda iştirak edən hər hansı vasitəçinin səylərinə xələl gətirmək məqsədilə ödənişlər etdiyinə dair irəli sürdüyü iddiaları qətiyyətlə pisləyir və rədd edir. Bu cür əsassız iddialar yalnız vasitəçilik səylərini sabotaj etmək və ölkələr arasında münasibətlərə xələl gətirmək istəyənlərin gündəliyinə xidmət edir”, – deyə Qətər Beynəlxalq Media Ofisinin cümə axşamı günü verdiyi bəyanatda bildirilir.

İttihamlar müharibəni siyasiləşdirməyə davam edən dezinformasiya kampaniyasının yeni mərhələsi kimi qiymətləndirilib.

Qətər müharibəni sona çatdırmaq üçün vasitəçiliyi həm humanitar, həm də diplomatik məsuliyyət olaraq gördüyünü vurğulayaraq, Misirlə daimi atəşkəsə nail olmaq və mülki insanları qorumaq üçün səylərini davam etdirdiyini bəyan edib.

Bəyanatda həmçinin Misirin regional sabitliyin təmin edilməsində mühüm rol oynadığı vurğulanıb.

Dohanın bəyanatı İsrail mediasının Baş Nazir Benyamin Netanyahunun müşavirlərinin Misirin ‘‘Həmas’’-İsrail danışıqlarındakı rolunu gözdən salan məlumatlar yaymasından sonra verilib.

Cümə axşamı İsrail məhkəməsi Netanyahunun iki müşavirinin həbs müddətini daha bir gün uzadıb. Müşavirlər Jonatan Urich və Eli Feldstein Qətərdən pul almaqda ittiham olunurlar.

İsrailin KAN mətbuat orqanı Rişon LeZion Sülh Məhkəməsinin şübhəlilərin həbs müddətini 24 saat uzatdığını açıqlayıb. KAN araşdırmalar zamanı müttəhimlərin ifadələrində ziddiyyətlərin olduğunu və dindirmə zamanı şübhəlilərdən birinin yalan danışdığını bildirib.

"Jerusalem Post"-un baş redaktoru Zvika Klein sözügedən məsələ ilə bağlı dindirildikdən sonra cümə axşamı ev dustaqlığından azad edildiyini qeyd edib.

İsrailin baş prokuroru Qali Baharav-Miara bildirib ki, istintaq çərçivəsində daha iki jurnalist ifadə verməyə çağırıla bilər.