BMT-nin altı agentliyinin birgə bəyanatında deyilir ki, İsrailin son hücumları və blokadası Qəzzada humanitar dağıntıları dərinləşdirib və insan həyatına açıq-aşkar laqeydlik nümayiş etdirir.
Birləşmiş Millətlər Təşkilatının altı agentliyinin rəhbərləri Qəzzaya yönəldilmiş İsrailin hücumlarına və blokadanın dağıdıcı nəticələrinə diqqət çəkərək, dünyanın “insan həyatına tamamilə laqeyd müharibə apardığına" şahidlik etdiyini bildiriblər.
Birləşmiş Millətlər Təşkilatının Humanitar Məsələlərin Əlaqələndirilməsi Ofisi (OCHA), Birləşmiş Millətlər Təşkilatının Uşaq Fondu (UNICEF), Birləşmiş Millətlər Təşkilatının Layihə Xidmətləri Ofisi (UNOPS), BMT-nin Yaxın Şərqdəki Fələstinli Qaçqınlara Yardım və İşlər üzrə Agentliyi (UNRWA), Birləşmiş Millətlər Təşkilatının Ümumdünya Ərzaq Proqramı (ÜƏP) və Ümumdünya Səhiyyə Təşkilatının (ÜST) imzaladıqları birgə bəyanatda bildirilib ki, bir aydan uzun müddətdir Qəzzada nə ticari nə də humanitar yardıma icazə verilir. 2,1 milyondan çox insan yenidən bombalanır, aclıqla qarşı-qarşıyadır və mühasirəyə alınıb. Ərzaq, dərman, yanacaq və sığınacaq sərhəd-keçid məntəqələrinə yığılır, lakin çatdırıla bilmir.
Atəşkəsin pozulmasından sonra ilk həftədə 1000-dən çox uşağın öldüyü və ya yaralandığı bildirilən bəyanatda “Bu, Qəzzada son bir ildə qeydə alınan uşaqlar arasında ən yüksək həftəlik ölüm sayıdır” ifadəsi yer alıb.
Humanitar yardımın dayandığına diqqət çəkilən bəyanatda diqqətə çatdırılıb ki, bir neçə gün əvvəl atəşkəs dövründə Ümumdünya Ərzaq Proqramı tərəfindən dəstəklənən 25 çörəkbişirmə müəssisəsi un və qaz qıtlığı səbəbindən bağlanmaq məcburiyyətində qaldı.
BMT rəsmiləri humanitar böhranın miqyasının görünməmiş dərəcəyə çatdığını vurğulayaraq, "Qəzzada insan həyatına tam laqeydliklə yanaşılan bir müharibənin şahidiyik" deyiblər.
Bəyanatda o da vurğulanıb ki, İsrailin yeni təxliyə göstərişləri yüz minlərlə fələstinlini qaçmağa məcbur etdi və onlara sığınacaq axtaracaqları heç bir yer qalmadı. Qəzzaya kifayət qədər yardımın çatdığına dair iddialar “hadisələrin baş verdiyi yerdəki reallıqdan uzaq”dır.
Bildirilib ki, 2023-cü ilin oktyabr ayından bəri ən azı 408 humanitar işçi gəlib ki, onlardan 280-dən çoxu UNRWA-nın əməkdaşlarıdır.
Birgə bəyanatda dünya hökumətlərinə beynəlxalq humanitar hüquqa riayət etmək məsuliyyəti xatırladılıb və "Mülki insanları qoruyun. Yardımın çatdırılmasını asanlaşdırın. Girovları azad edin. Atəşkəs rejimini təzələyin" ifadələri ilə təcili və qəti müdaxiləyə çağırılıb.
