Më shumë se gjysma e të rriturve dhe një e treta e fëmijëve, adoleshentëve dhe të rinjve në botë pritet të kenë mbipeshë ose obezitet deri në vitin 2050, sipas një studimi të fundit.

Ky parashikim bazohet në një studim global të publikuar të hënën në revistën mjekësore The Lancet, i cili analizon të dhëna nga më shumë se 200 vende.

Dita Botërore e Obezitetit shënohet më 4 mars si një mundësi për t'i inkurajuar njerëzit të njohin shkaqet e obezitetit, të bëhen të vetëdijshëm për faktorët e rrezikut dhe të ndajnë përvojat e tyre.

Studiuesit paralajmërojnë se shkalla e obezitetit do të rritet ndjeshëm gjatë dekadës së ardhshme, veçanërisht në vendet me të ardhura më të ulëta.

Që nga viti 2021, pothuajse gjysma e popullsisë së rritur globale – rreth një miliard burra dhe 1,11 miliardë gra mbi moshën 25 vjeç kishin mbipeshë ose ishin obezë.

Nëse trendet aktuale vazhdojnë, parashikohet që shkalla globale e mbipeshës dhe obezitetit tek të rriturit të arrijë në 57,4 për qind për burrat dhe 60,3 për qind për gratë deri në vitin 2050, sipas studimit.

Gjithashtu, parashikohet që Kina, India dhe ShBA-ja të kenë numrin më të madh të personave me mbipeshë ose obezitet deri në vitin 2050.