Италия Стамбулда Ливия менен өткөрүлгөн үч тараптуу саммит учурунда мыйзамсыз миграция агымдарын башкарууда Түркия менен кызматташуу тууралуу мактоо менен сөз кылды жана жыйынтыктарын “мыкты” деп мүнөздөдү.

Президент Режеп Таййип Эрдоган, Италиянын премьер-министри Жоржия Мелони жана Ливиянын премьер-министри Абдулхамид Дибейбе жалпы кыйынчылыктарга каршы кызматташуу маселелерин талкуулоо үчүн жолугушту. Саммиттин негизги күн тартибин мыйзамсыз миграция маселеси түздү.

Мелони Түркия менен бул багытта жетишилген "мыкты натыйжаларды" белгилеп, Түркиянын кызматташтык тажрыйбасынан сабак алып, Ливиянын миграцияны башкаруу аракеттерин колдоого кызыкдар экендигин билдирди.

Италия өкмөтүнөн жасалган билдирүүдө : “Ушунун негизинде премьер - министр Мелони адам сатууга аралашкан эл аралык кылмыш тармактары менен күрөшүү, мыйзамсыз аракетерди алдын алуу, Ливия бетме - бет болгон миграция кысымын башкаруусуна колдоо көрсөтүү үчүн бир нече чара боюнча кесиптештери менен сүйлөштү”,- деп айтылды.

Лидерлер өзгөчө Ливиянын биримдиги, көз карандысыздыгы жана саясий туруктуулугуна колдоо боюнча милдеттенмелерин дагы бир жолу такташты.

Мелони БУУнун колдоосу менен ливиялыктардын өздөрү жетектеген саясий процесске колдоо көрсөтүп, ишенимдүү шайлоо өткөрүү үчүн шарттарды түзүүгө чакырды.

Үч тарап белгилүү бир убакыттын алкагында ташталуучу конкреттүү кадамдарды аныктоо үчүн техникалык деңгээлдеги талкууларды кайра баштоо боюнча макулдашты.

Түркиянын Коммуникация башкармалыгы Жер Ортолук деңизинде аймактык көйгөйлөргө, өзгөчө мыйзамсыз миграцияга каршы күрөшүүдө үч тараптуу кызматташуунун маанилүүлүгүн баса белгиледи.