Mas'uuliyiinta Aljeeriya ayaa Axaddii dalka ka saaray laba wakiil oo sirdoon Faransiis ah kadib markii ay dalka soo galeen iyagoo isticmaalaya “baasabooro diblomaasiyadeed oo been abuur ah,” taasoo calaamad cusub u ah xiisadaha sii kordhaya ee u dhexeeya labada dal.
Sida laga soo xigtay telefishinka Aljeeriya International TV, oo ah kanaal warbaahineed oo ay dawladdu maamusho, labada qof waxay ka hoos shaqeyn jireen Agaasinka Amniga Gudaha ee Wasaaradda Arrimaha Gudaha Faransiiska, waxayna “ku guuldareysteen inay raacaan habraacyada sharciga ah” markii ay gudaha u galeen dhulka Aljeeriya.
Telefishinku wuxuu dhacdadan ku tilmaamay “tallaabo farsamo” uu soo agaasimay Wasiirka Arrimaha Gudaha ee Faransiiska, Bruno Retailleau.
Ma jiro wax war ah oo rasmi ah oo ka soo baxay mas'uuliyiinta Faransiiska oo ku saabsan arrintan.
Xiriirka Cakiran
Horumarkan ayaa yimid toddobaadyo kadib markii Aljeeriya ay bilowgii Abriil dalka ka eriday 12 shaqaale oo safaaradda Faransiiska ah, taasoo ahayd falcelin lagu sameeyay xarigga sarkaal ka tirsan qunsuliyadda Aljeeriya ee Paris oo lagu eedeeyay inuu ku lug lahaa afduubka saameeyaha mucaarad Aljeeriyaan ah.
Faransiiska ayaa markii dambe ka jawaabay isaga oo dalkiisa ka saaray 12 diblomaasiyiin Aljeeriyaan ah isla markaana safiirkiisii Algiers dib ugu yeeray si wadatashi loola yeesho.
Tallaabooyinkan is-daba joogga ah ee la isaga jawaabayay ayaa yimid kadib dabacsanaan yar oo xiriirka ku timid, ka dib markii madaxweynaha Aljeeriya Abdelmadjid Tebboune iyo dhiggiisa Faransiiska Emmanuel Macron ay telefoon ku wada hadleen dhammaadkii Maarso, iyo booqasho uu Algiers ku tagay Wasiirka Arrimaha Yurub ee Faransiiska, Jean-Noel Barrot, 6-da Abriil.
Intii lagu jiray booqashadaas oo labada dhinac ballanqaadeen inay dib u bilaabi doonaan hababka iskaashiga labada dal.
Xiriirka diblomaasiyadeed ee u dhexeeya Aljeeriya iyo Faransiiska ayaa weli ah mid isbeddel badan leh, gaar ahaan sababo la xiriira arrimaha aan weli xal loo helin ee ka dhashay gumeysigii Faransiiska ee Aljeeriya intii u dhaxaysay 1830 ilaa 1962.
