Madaxweynaha Namibia Netumbo Nandi-Ndaitwah ayaa Arbacadii u magacowday Ingenesia Inge Zaamwani wasiirka cusub ee beeraha, kalluumeysiga, biyaha iyo dib-u-habeynta dhulka.

Zaamwani ayaa beddeshay Mac-Albert Hengari, kaasoo Nandi-Ndaitwah ay xilka ka xayuubisay bil ka hor ka dib markii la xiray. 

Madaxtooyadu ayaa sheegtay in Zaamwani ay la timid khibrad iyo aqoon aad u badan, iyadoo soo qabatay jagooyin muhiim ah oo dhinacyada macdanta, adeegyada maaliyadeed iyo dowladda ah.

"Zaamwani waxay soo noqotay agaasimaha maamulka ee Namdeb (shirkad macdan qodista), guddoomiyaha Bangiga Qaranka Koowaad ee Namibia iyo shirkado kale oo ka shaqeeya qaybta macdanta, iyo meelo kale oo badan.

Ka hor inta aan loo magacaabin wasiirka maamulka siddeedaad, Zaamwani waxay ahayd La-Taliyaha Gaarka ah ee Madaxweynaha ee Arrimaha Dastuurka iyo Isdhexgalka Ganacsiga Gaarka ah,' ayaa lagu yiri bayaanka."  

'Fursado cusub oo lagu kobcinayo qiimaha iyo shaqo abuur'

Waxaa lagu sheegay in khibradeeda maamul, warshadeed iyo hoggaamineed awgeed, Nandi-Ndaitwah ay aaminsan tahay in Zaamwani ay furi doonto fursado qiime-ku-dar, shaqo abuuris iyo sugnaan cunto oo ku jira qaybaha wasaaradeeda hoos yimaada.

Bayaan kale ayaa lagu shaaciyay in Nandi-Ndaitwah ay Zaamwani u magacawday xubin aan cod lahayn oo baarlamaanka ka tirsan.

Hengari, oo xilka la magacaabay bishii Maarso, ayaa wajahayaa baaritaan ku saabsan eedeymo badan, oo ay ku jiraan kufsi, rabshado ku saleysan jinsiga iyo afduub.

Waxaa maxkamadda la horgeeyay 28-kii Abriil isagoo lagu soo oogay dacwad ah faragelinta caddaaladda, arrintaas oo isaga iyo eedeysanaha kale oo 30 jir ah ay mar kale maxkamad soo hor istaagi doonaan 3-da Juun.

Eedeysanaha la socda Hengari ayaa la sheegay inuu qaraabo la yahay gabar hadda 21 jir ah taasoo Hengari lagu eedeeyay inuu kufsaday markay 16 jir ahayd uuna hadda isku dayay inuu laaluush siiyo si ay dacwadda uga laabato, sida ay booliisku sheegeen markii la xiray.