Maxkamadda Mareykanka ayaa Jimcihii go’aamisay in la sii daayo ardayadda dhigata heerka Daktareelnimada Rumeysa Öztürk, oo lagu xiray Mareykanka sababtoo ah taageerada ay u fidisay Falastiin.

Garsooraha Maxkamadda Federaalka Mareykanka ee gobolka Vermont, William Sessions, ayaa go’aamiyay in la sii daayo Öztürk "dammaanad" kadib dhageysi socday ku dhawaad 3 saacadood.

Intii lagu guda jiray dhageysiga, Garsoore Sessions wuxuu caddeeyay in qareenka dowladda Mareykanka "uusan soo bandhigin wax caddeyn ah" oo qiil u noqon karta sii haynta Öztürk, marka laga reebo qoraal ay ku qortay bogga internetka ee jaamacadda.

Garsooruhu wuxuu intii dhageysigu socday dhegaystay afar markhaati oo u hadlay dhinaca ardayadda Turkiga ah, waxayna dalbadeen in la sii daayo Öztürk oo la ildaran cudurka neefta.

Garsooruhu wuxuu xusay in ardayadda Turkiga ah ay ku jirto marxalad sare oo waxbarashadeeda ah, taasina ay uga baahan tahay inay ka qayb gasho barnaamijyo ka baxsan gobolka ayna bixiso casharro ka baxsan gobolka, sidaa darteedna aysan jirin wax sabab lagu xaddido safarkeeda ama lagu xiro qalabka elektaroonigga ah ee lagula socdo.

Mas'uuliyiinta Mareykanka ayaa ardayada Öztürk xireen 25-kii Maarso ee sanadkan, gobolka Massachusetts, iyagoo ku eedeeyay taageerada Falastiin, ka dibna waxay u wareejiyeen Louisiana, halkaasoo lagu dhageystay qiraallada fadhigii koowaad ee dacwadda.

Xilligaas, Wasiirka Arrimaha Dibadda Mareykanka Marco Rubio wuxuu sheegay in dalkiisu uu joojiyay fiisadii Öztürk, islamarkaana uu damacsan yahay inuu ka tarxiilo Mareykanka.

Rubio wuxuu sheegay in dalkiisu uu laalay fiisooyinka in ka badan 300 oo arday ajnabi ah oo uu ku tilmaamay inay yihiin "taageerayaasha Xamaas."