Mjekët dhe ekipet e shpëtimit palestineze kanë nxjerrë edhe gjashtë trupa të tjera nga rrënojat në Rripin e Gazës, duke e çuar në 48.446 numrin e përgjithshëm të të vrarëve në luftën gjenocidale izraelite që nga tetori i vitit 2023, njoftoi të enjten Ministria e Shëndetësisë.

Në njoftimin e ministrisë thuhet se shtatë palestinezë të plagosur janë dërguar në spitale në 24 orët e fundit, duke e çuar në 111.852 numrin e të plagosurve nga sulmet izraelite.

"Shumë viktima ende ndodhen nën rrënoja dhe në rrugë, pasi ekipet e shpëtimit nuk mund të arrijnë deri te ta", thuhet më tej në deklaratë.

Marrëveshja për armëpushim dhe shkëmbimin e të burgosurve në Gaza është në fuqi që nga 19 janari, duke ndalur luftën izraelite që shkaktoi shkatërrime të mëdha dhe e la enklavën palestineze në rrënoja.

Pavarësisht armëpushimit, autoritetet lokale në Gaza raportojnë pothuajse çdo ditë për shkelje të marrëveshjes nga ushtria izraelite.

Në nëntorin e kaluar, Gjykata Ndërkombëtare Penale lëshoi urdhërarreste për kryeministrin izraelit Benjamin Netanyahu dhe ish-ministrin e mbrojtjes Yoav Gallant për krime lufte dhe krime kundër njerëzimit në Gaza.

Izraeli gjithashtu po përballet me një çështje për gjenocid në Gjykatën Ndërkombëtare të Drejtësisë për shkak të luftës në enklavë.