Mbrojtja dhe siguria e Evropës dhe Ukrainës janë të ndërthurura, vuri në dukje presidenti i Këshillit të BE-së Antonio Costa të enjten.

Duke folur në Bruksel në pragun e samitit të posaçëm të Këshillit të BE-së për mbrojtjen evropiane dhe Ukrainën, së bashku me presidentin ukrainas Volodymyr Zelenskyy dhe presidenten e Komisionit të BE-së, Ursula Von Der Leyen, Antonio Costa shtoi: "Kjo është arsyeja pse, ne jemi këtu për të mbështetur Ukrainën për një paqe gjithëpërfshirëse, të drejtë dhe të qëndrueshme".

Von Der Leyen, nga ana e saj, theksoi se kohët e jashtëzakonshme kërkojnë masa të jashtëzakonshme.

"Është një moment vendimtar për Evropën, dhe Ukraina është pjesë e familjes sonë evropiane. Është gjithashtu një moment vendimtar për Ukrainën. Evropa përballet me një rrezik të qartë dhe të pranishëm, dhe për këtë arsye Evropa duhet të jetë në gjendje të mbrohet, të mbrojë veten, pasi ne duhet ta vendosim Ukrainën në një pozicion për të mbrojtur veten dhe për të nxitur për paqe të qëndrueshme dhe të drejtë," tha ajo.

Von Der Leyen shtoi: "Ne duam një forcë paqësore dhe kjo është arsyeja pse unë sot paraqes para liderëve planin e riarmatimit të Evropës".

Zelenskyy, nga ana e tij, vlerësoi përpjekjet e BE-së për të vazhduar mbështetjen e Ukrainës.

"Është shumë e rëndësishme që ju i keni dhënë një sinjal të fortë popullit ukrainas, luftëtarëve ukrainas, civilëve, të gjitha familjeve tona. Dhe është mirë që ne nuk jemi vetëm. Ne e ndiejmë këtë dhe e dimë," tha ai.