غەززە ھۆكۈمەت تاراتقۇ ئىشخانىسى غەززەدە 40 مىڭى بىر ياشتىن تۆۋەن بوۋاقلارنى ئۆز ئىچىگە ئالغان 100 مىڭدىن ئارتۇق كىچىك بالىنىڭ بوۋاقلارغا ئىشلىتىلىدىغان سۈت پاراشوكى ۋە ئوزۇقلۇق تولۇقلىمىلىرىنىڭ پۈتۈنلەي تۈگىشى سەۋەبىدىن ئۆلۈم خەۋپىگە دۇچ كەلگەنلىكىنى بىلدۈردى.
شەنبە كۈنى ئېلان قىلىنغان باياناتتا، ئىشخانا بۇ ئەھۋالنى «ئاستا ئىلگىرىلەۋاتقان بىر قىرغىنچىلىق» دەپ تەسۋىرلىدى ۋە ئىسرائىلىيەنى چېگرا ئېغىزلىرىنى تاقاش ۋە قورشاۋنى داۋاملاشتۇرۇش ئارقىلىق غەززەنىڭ ئەڭ ياش ئاھالىسىنى قەستەن ئاچ قويۇش بىلەن ئەيىبلىدى.
ئىشخانىنىڭ بىلدۈرۈشىچە، ئانىلار سۈت پاراشوكى تاپالمىغانلىقتىن بوۋاقلىرىنى كۈنلەپ پەقەت سۇ بىلەنلا بېقىشقا مەجبۇر بولماقتا. بۇ جەرياندا دوختۇرخانىلار ۋە ساقلىقنى ساقلاش مەركەزلىرى ئېغىر ۋە ھاياتىغا خەۋپ يەتكۈزىدىغان دەرىجىدىكى ئوزۇقلۇق يېتىشمەسلىك دېلولىرىنىڭ كۈنسىرى كۆپىيىۋاتقانلىقىغا شاھىت بولماقتا.
غەززەدىكى سەھىيە دائىرىلىرى، داۋالاش سىستېمىسىنىڭ پۈتۈنلەي دېگۈدەك يىمىرىلىشى ۋە ئاساسلىق يېمەكلىك ماتېرىياللىرىنىڭ ئىنتايىن قىس بولۇشى سەۋەبىدىن ھازىرغىچە 83 نەپىرى كىچىك بالا بولۇپ، ئاچارچىلىق ۋە ئوزۇقلۇق يېتىشمەسلىك سەۋەبىدىن جەمئىي 122 ئۆلۈم دېلوسىنى دوكلات قىلدى.
بۇ كرىزىسنى «ئىنسانىيەت ۋە دۇنياۋى ۋىجدان نامىدا بېرىلگەن ئىنتايىن كۈچلۈك بىر ئاگاھلاندۇرۇش» دەپ ئاتىغان تاراتقۇ ئىشخانىسى، بوۋاقلار ئۈچۈن سۈت پاراشوكى ۋە ئوزۇقلۇق تولۇقلىمىلىرىنىڭ دەرھال كىرگۈزۈلۈشىگە رۇخسەت قىلىنىشى، بارلىق چېگرا ئېغىزلىرىنىڭ شەرتسىز ئېچىلىشى، ئىسرائىلىيەنىڭ «جىنايى قورشاۋى» نىڭ بىكار قىلىنىشى ۋە بالىلارغا قارىتىلغان «قەستەن يوقىتىش ھەرىكىتى» نى توختىتىش ئۈچۈن جىددىي خەلقئارالىق ئارىلىشىشقا چاقىردى.
ئىشخانا ئىسرائىلىيە ھۆكۈمىتى ۋە خەلقئارالىق ئىتتىپاقداشلىرىنى «ئىنسانىيەتكە قارشى ئېلىپ بېرىلىۋاتقان بىر جىنايەتنىڭ تولۇق جاۋابكارى» دەپ جاكارلاپ، داۋاملىشىۋاتقان دۇنياۋىي سۈكۈتنىڭ «غەززە بالىلىرىغا قارىتىلغان ئىرقىي قىرغىنچىلىققا ئوچۇق-ئاشكارا شېرىك بولغانلىق» مەنىسىنى بىلدۈرىدىغانلىقى توغرىسىدا ئاگاھلاندۇردى.
خەلقئارانىڭ ئۇرۇش توختىتىش چاقىرىقلىرىنى رەت قىلغان ئىسرائىلىيە ئارمىيەسى 2023-يىلى 7-ئۆكتەبىردىن بۇيان غەززەگە قاراتقان رەھىمسىز ھۇجۇمىنى داۋاملاشتۇرۇپ، كۆپىنچىسى ئاياللار ۋە بالىلار بولغان 59 مىڭ 700 دىن ئارتۇق پەلەستىنلىكنى ئۆلتۈردى. ئۈزلۈكسىز بومباردىمان رايوننى ۋەيران قىلىپ، يېمەكلىك قىسىلىقىنى كەلتۈرۈپ چىقاردى.
ئۆتكەن يىلى نويابىردا، خەلقئارا جىنايى ئىشلار سوتى ئىسرائىلىيە باش مىنىستىرى بېنيامىن نېتانياھۇ ۋە سابىق دۆلەت مۇداپىئە مىنىستىرى يوئاۋ گالانت ئۈستىدىن غەززەدىكى ئۇرۇش جىنايەتلىرى ۋە ئىنسانىيەتكە قارشى جىنايەتلەر سەۋەبىدىن قولغا ئېلىش بۇيرۇقى چىقارغان ئىدى.
ئىسرائىلىيە يەنە رايونغا قاراتقان ئۇرۇشى سەۋەبىدىن خەلقئارا ئەدلىيە سوتىدا ئىرقىي قىرغىنچىلىق دېلوسىغا دۇچ كەلمەكتە.