ئوتتاۋا، پەلەستىن ھۆكۈمىتىنىڭ ئىدارە-ئورگان ئىسلاھاتى ئېلىپ بېرىشى ۋە كەلگۈسىدە ھاماسنى رەھبەرلىكتىن چەتكە قېقىش شەرتى بىلەن، 2025-يىلى سېنتەبىردە ب د ت دا پەلەستىننى ئېتىراپ قىلىشنى پىلانلىماقتا.
كانادا، پەلەستىن ھۆكۈمىتىنىڭ مۇھىم ئىسلاھاتلارنى ئەمەلگە ئاشۇرۇشى شەرتى بىلەن، 2025-يىلى سېنتەبىردە ئۆتكۈزۈلىدىغان ب د ت ئومۇمىي كېڭىشىنىڭ 80-نۆۋەتلىك يىغىنىدا پەلەستىن دۆلىتىنى ئېتىراپ قىلىدىغانلىقىنى جاكارلىدى، ئىككى دۆلەتلىك ھەل قىلىش چارىسى ئېھتىماللىقىنىڭ «كۆز ئالدىمىزدا يوقىلىپ كېتىۋاتقانلىقى» ھەققىدە ئاگاھلاندۇردى.
باش مىنىستىر مارك كارنىي باياناتىدا مۇنداق دېدى: «كانادا ئۇزۇندىن بۇيان ئىسرائىلىيە دۆلىتى بىلەن تىنچلىق ۋە بىخەتەرلىك ئىچىدە بىللە ياشايدىغان، مۇستەقىل، ئىمكانىيەتلىك سىجىل ۋە ئىگىلىك ھوقۇقلۇق پەلەستىن دۆلىتىدىن تەركىب تاپقان ئىككى دۆلەتلىك ھەل قىلىش چارىسىگە سادىق بولۇپ كەلدى. ئون يىللاردىن بۇيان بۇ نەتىجىنىڭ، ئىسرائىلىيە ھۆكۈمىتى بىلەن پەلەستىن ھۆكۈمىتى ئوتتۇرىسىدا سۆھبەتلىشىپ ھاسىل قىلىنغان كېلىشىمگە ئاساسلانغان تىنچلىق مۇساپىسى رامكىسىدا ئەمەلگە ئاشىدىغانلىقى ئۈمىد قىلىنىپ كەلگەن ئىدى. ئەپسۇسكى، بۇ ئۇسۇل ئەمدى داۋاملاشتۇرغىلى بولمايدىغان ھالەتكە كەلدى»
كارنىي تىنچلىق مۇساپىسىگە بۇزغۇنچىلىق قىلىۋاتقان بىر قانچە يېڭى ئەھۋال تەرەپكە دىققەتلەرنى تارتتى.
بۇلارنىڭ ئىچىدە، ئىشغال قىلىنغان غەربىي قىرغاق ۋە شەرقىي قۇددۇستىكى ئىسرائىلىيە ئولتۇراق رايونلىرىنىڭ تېز كېڭىيىشى، ئىسرائىلىيە پارلامېنتىنىڭ ئىشغال قىلىنغان غەربىي قىرغاقنىڭ بىر قىسىم رايونلىرىنى قوشۇۋېلىشقا ئۇرۇنۇشلىرى ۋە غەززەدىكى ئىنسانپەرۋەرلىك كرىزىسىنىڭ چوڭقۇرلىشىشىغا ئەگىشىپ ياردەمگە ئېرىشىشنىڭ چەكلىنىشى قاتارلىقلار بار.
كارنىي: «پۇقرالارنىڭ كۈنسېرى ئېشىۋاتقان ئازاب-ئوقۇبەتلىرى، خەلقئارالىق ماسلاشقان ھەرىكەتكە نىسبەتەن كېچىكتۈرۈشكە ئورۇن قويمىدى» دېدى.
پەلەستىننى ئېتىراپ قىلىش ئىسلاھاتقا باغلىق
كانادانىڭ پەلەستىننى ئېتىراپ قىلىشى، پەلەستىن ھۆكۈمىتى تەرىپىدىن ئېلىپ بېرىلىدىغان ئىدارە-ئورگان ئىسلاھاتىغا باغلىق بولىدۇ.
بۇ ئىسلاھاتلارنىڭ ئىچىدە، پىرېزىدېنت مەھمۇد ئابباسنىڭ 2026-يىلى ھاماس قاتناشمايدىغان ئومۇمىي سايلام ئۆتكۈزۈش ۋەدىسى ۋە كەلگۈسىدىكى پەلەستىن دۆلىتىنىڭ قورالسىزلاندۇرۇلۇشىنى كاپالەتلەندۈرۈش قاتارلىقلارمۇ بار.
كارنىي يەنە، ھاماس تەرىپىدىن 7-ئۆكتەبىردە تۇتقۇن قىلىنغانلارنىڭ دەرھال قويۇپ بېرىلىشى، بۇ گۇرۇپپىنىڭ قورالسىزلاندۇرۇلۇشى ۋە پەلەستىننى ئىدارە قىلىشتا ھېچقانداق رول ئوينىماسلىقىنى مۇراجىئەت قىلدى.
كارنىي: «كانادا ئوتتۇرا شەرقتە تىنچلىق ۋە بىخەتەرلىك ئىچىدە ياشايدىغان مۇستەقىل دۆلەت بولۇش سۈپىتى بىلەن ئىسرائىلىيەنىڭ مەۋجۇتلۇقىنى ھەر دائىم قەتئىي قوللايدۇ» دېدى ھەمدە، «ئىسرائىلىيە ئۈچۈن مەڭگۈلۈك تىنچلىققا بارىدىغان يول، شۇنىڭ بىلەن بىر ۋاقىتتا ئىسرائىلىيەنىڭ كەم بولسا بولمايدىغان بىخەتەرلىك ۋە تىنچلىق ھوقۇقىنى ئېتىراپ قىلىدىغان، ئىمكانىيەتلىك سىجىل ۋە مۇقىم بىر پەلەستىن دۆلىتىنىڭ قۇرۇلىشىنىمۇ تەلەپ قىلىدۇ» دېگەن سۆزلەرنى ئىشلەتتى.
كارنىي، كانادانىڭ خەلقئارالىق ھەمكارلاشقۇچىلار بىلەن بىرلىكتە ئىشەنچلىك بىر تىنچلىق پىلانىنى تۈزۈپ چىقىش ۋە غەززەگە كەڭ كۆلەملىك ئىنسانپەرۋەرلىك ياردىمى يەتكۈزۈلۈشىنى كاپالەتلەندۈرۈش ئۈچۈن تىرىشىدىغانلىقىنى بىلدۈردى.
ئۇ يەنە: «كانادا، رايوندا ئادىل، مەنىلىك ۋە مەڭگۈلۈك بىر تىنچلىقنى بەرپا قىلىشتا ئىجابىي بىر ھەمكارلاشقۇچى بولىدۇ؛ بارلىق پەلەستىنلىكلەر ۋە ئىسرائىلىيەلىكلەرنىڭ ئىززەت-ھۆرمىتى، بىخەتەرلىكى ۋە ئارزۇ-ئۈمىدلىرىنى كۆزىتىدىغان بىر تىنچلىق» دەپ قوشۇمچە قىلدى.