كابۇل دائىرىلىرىنىڭ بىلدۈرۈشىچە، كابۇلنىڭ ئەزغەندى ئېغىزى ئەتراپىدا بىر يولۇچىلار ئاپتوبۇسىنىڭ ئۆرۈلۈپ كېتىشى نەتىجىسىدە كەم دېگەندە 25 ئادەم جېنىدىن ئايرىلغان، 27 ئادەم يارىلانغان.تالىبان ھۆكۈمىتى ئىچكى ئىشلار مىنىستىرلىقىنىڭ باياناتچىسى ئابدۇل ماتىن قانى چارشەنبە كۈنى (27-ئاۋغۇست) تولو خەۋەر ئاگېنتلىقى (Tolo News) غا بەرگەن باياناتىدا، بۇ ۋەقەنىڭ سەيشەنبە كۈنى (26-ئاۋغۇست) كەچتە كابۇلدىكى ئەزغەندى ئېغىزى ئەتراپىدا يۈز بەرگەنلىكىنى بىلدۈردى.ئۇ سۆزلىرىگە ئىلاۋە قىلىپ، شوپۇرنىڭ بىپەرۋالىقى تۈپەيلىدىن ئاپتوبۇسنىڭ يولدىن چىقىپ ئۆرۈلۈپ كەتكەنلىكىنى قەيت قىلدى.تالىبان باياناتچىسى زەبىھۇللا مۇجاھىد ئانادولۇ ئاگېنتلىقىغا بەرگەن باياناتىدا، بۇ ۋەقەدە جەمئىي 44 ئادەمنىڭ ئوخشاش بولمىغان دەرىجىدە زىيانغا ئۇچرىغانلىقىنى بىلدۈردى.ئالدىنقى ئايدا، ھېرات ۋىلايىتىدىكى ھېرات-ئىسلام قەلئە تاشيولىدا، ئىراندا تۇرۇشلۇق مۇساپىرلارنى ئېلىپ كېتىۋاتقان بىر ئاپتوبۇسنىڭ يۈك ماشىنىسى ۋە موتوسىكلىت بىلەن سوقۇلۇپ ئوت كېتىشى نەتىجىسىدە، بالىلارنىمۇ ئۆز ئىچىگە ئالغان 79 ئادەم جېنىدىن ئايرىلغان ئىدى.تاشيول ئۇل-ئەسلىھەلىرىنىڭ ناچارلىقى ۋە بىپەرۋالىق بىلەن ھەيدەش سەۋەبىدىن، ئافغانىستاندا قاتناش ۋەقەلىرى داۋاملىق يۈز بېرىدىغان تىراگېدىيەگە ئايلانغان.