Kiyev Rossiya Ukraina bilan uch yillik urush davomida eng yirik raketa va dron hujumini amalga oshirganini, asosan mamlakatning g‘arbiy hududlarini nishonga olganini ma'lum qildi.

Ukraina havo kuchlari chorshanba kuni Rossiya 728 ta dron va 13 ta raketa bilan hujum qilganini, havo mudofaa tizimlari 711 ta dronni ushlab qolganini va kamida yetti raketa yo‘q qilinganini bildirdi.

“Bu hujum juda muhim va aynan tinchlikka erishish, o‘t ochishni to‘xtatish bo‘yicha ko‘plab harakatlar amalga oshirilayotgan bir paytda sodir bo‘ldi. Lekin faqat Rossiya bularning barchasini rad etishda davom etmoqda,” deb yozdi Ukraina rahbari Volodimir Zelenskiy ijtimoiy tarmoqlarda.

U ittifoqchilarni Rossiyaga qarshi sanksiyalarni kuchaytirishga, ayniqsa, Rossiya urush byudjetining muhim daromad manbai bo‘lgan energetika sektorini nishonga olishga chaqirdi.

“Hamkorlarimiz Rossiyani urushni tugatish haqida o‘ylashga majbur qiladigan bosimni qanday qo‘llashni bilishadi, yangi hujumlarni boshlashni emas,” deya qo‘shimcha qildi Zelenskiy.

G‘arbiy Lutsk shahri meri Igor Polishchuk “korxona”da yong‘inlar chiqqanini va hech kim halok bo‘lmagan yoki jarohat olmaganini ma'lum qildi.

So‘nggi hujum Rossiyaning shu oyning boshida qayd etilgan 550 ta dron va raketa rekordini yangiladi.

Bu hujum AQSh Ukrainaga qurol yetkazib berishni qisqartirish haqidagi e'lonini qayta ko‘rib chiqqanidan keyin sodir bo‘ldi.

“Rossiyaning bu hujumni AQSh bizga qurol yetkazib berishini e'lon qilgan paytda amalga oshirgani juda ahamiyatli,” deb yozdi Ukraina prezidentining ma'muriyati rahbari Andriy Yermak ijtimoiy tarmoqlarda.