Rossiya kechasi Kiyevga katta dron va raketa hujumini amalga oshirdi, natijada ikki kishi halok bo‘ldi, kamida 16 kishi jarohat oldi va poytaxtning beshta tumanida yong‘inlar yuzaga keldi, deb xabar berdi rasmiylar.
Shahar hokimi Vitaliy Klichkoning so‘zlariga ko‘ra, urib tushirilgan dron va raketalarning qoldiqlari bir nechta turar-joy hududlariga tushib, binolarga zarar yetkazgan va katta yong‘inlarni keltirib chiqargan.
Shevchenkivskiy tumanida urib tushirilgan nishonlarning qoldiqlari turar-joy binolarining yuqori qavatlariga zarar yetkazib, yong‘inlar keltirib chiqardi. Darnitskiy tumanida garajlar va yonilg‘i quyish shoxobchasi yonib ketdi. Solomenskiy tumanida esa noturar-joy binosining tomi yonib ketdi. Podolskiy tumanida bir klinika deyarli butunlay vayron bo‘ldi. Goloseevskiy tumanida esa dron qoldiqlari yuk mashinasiga tushdi.
AQShdan yangi qurol yordami
Klichkoning ma’lumotiga ko‘ra, hujum natijasida ikki kishi halok bo‘lgan. Yana 16 kishi jarohatlangan, ulardan o‘ntasi kasalxonaga yotqizilgan. Qalin tutun shaharni qamrab oldi va rasmiylar aholini boshpanalardan qaytgach, derazalarni yopishga chaqirdi.
Hujum Kiyev viloyatiga ham ta’sir ko‘rsatdi. Viloyat harbiy ma’muriyatining ma’lumotiga ko‘ra, uylar va xo‘jalik binolari zarar ko‘rgan, to‘rt tumanda yong‘inlar qayd etilgan. Obuxov tumanida bir kishi jarohat olib, kasalxonaga yotqizilgan.
Bir kun avval Ukraina Rossiya urush boshlanganidan beri eng katta hujumni qayd etdi — 728 ta dron uchirilgan. Bungacha eng katta hujum 4-iyulda bo‘lgan edi — 539 ta dron va 11 ta raketa. 29-iyun kuni esa 537 ta havo nishoni uchirilgani haqida xabar berilgan edi.
New York Times manbalariga ko‘ra, Rossiya prezidenti Vladimir Putin Ukraina mudofaasi bosimga dosh bera olmasligiga umid qilmoqda.
Bungacha AQSh Pentagon inventarizatsiyasi sababli Ukrainaga qurol yetkazib berishni to‘xtatgan edi. Katta hujumlardan so‘ng, Tramp yordamni qayta tiklashni buyurdi va Ukrainaga yana bir Patriot havo mudofaa tizimini topshirish ehtimolini e’lon qildi.
“Ular juda qattiq zarba olishmoqda. Shuning uchun bu masalani ko‘rib chiqamiz,” dedi u.
