Turkiya Prezidenti Rajab Toyyib Erdo‘g‘an Rossiya va Ukraina o‘rtasidagi urushni tugatish imkoniyatini qo‘ldan boy bermaslik kerakligini ta’kidladi.

Turkiya Aloqa boshqarmasi ma’lum qilishicha, Erdo‘g‘an Avstriya kansleri Kristian Stoker bilan telefon orqali muloqot qilib, ikki tomonlama aloqalar, shuningdek, mintaqaviy va global masalalarni muhokama qilgan.

Suhbat davomida Erdo‘g‘an G‘azoga zudlik bilan insonparvarlik yordamini yetkazib berish nihoyatda muhim ekanini ta’kidladi.

Suriya masalasiga to‘xtalar ekan, u Turkiya mamlakatda barqarorlikni ta’minlash uchun o‘z sa’y-harakatlarini davom ettirayotganini va suriyalik qochqinlarning o‘z vatanlariga qaytishini osonlashtirish uchun ijtimoiy va iqtisodiy farovonlikni oshirish muhimligini aytib o‘tdi.

Prezidentning so‘zlariga ko‘ra, Turkiya va Avstriya savdo va investitsiya sohalaridagi imkoniyatlardan samarali foydalanishi kerak va ular hamkorlikni kuchaytirish uchun qadamlar tashlashda davom etadi.