Cənubi Koreya mediası mayin 9-da ölkədəki hakim partiyanın prezidentliyə namizəd kimi sabiq Baş nazir Han Dok-sunu seçdiyini açıqlayıb.

Yonhap Xəbər Agentliyinin məlumatına görə, bu gözlənilməz qərar Han ilə Xalqın Gücü Partiyası (XGP) arasında aparılan danışıqlardan sonra qəbul edilib. XGP bundan əvvəl gələn ay keçiriləcək seçkilərdə namizəd olaraq Kim Mun-sunu irəli sürmüşdü.

Xalqın Gücü Partiyası, Kimin namizədliyinin ləğv edilməsi prosesinə başlamaq üçün təcili toplantı çağırıb. Rəsmi qərarın mayın 11-də elan olunacağı gözlənilir. Kim bu addımı “gecəyarısı siyasi çevrilişi” adlandıraraq sərt şəkildə tənqid edib.

Mayın 9-da Kim Mun-sunun, XGP rəhbərliyinin qərarını dayandırmaq üçün Seul şəhərindəki bir məhkəməyə təcili tədbir tələbi ilə müraciət etdiyi də bildirilib. Kim daha əvvəl namizədlikdən uzaqlaşdırılması qərarına qarşı hüquqi və siyasi addımlar atacağını bəyan etmişdi.

Kim Mun-su deyib: “Gecəyarısı siyasi çevriliş baş verdi. Bu, təkcə Cənubi Koreyanın konstitusiya tarixində deyil, dünya tarixində də misli görünməmiş bir hadisədir.” O, həmçinin bildirib ki: “Bu vəziyyətə cavabdeh olanları hüquqi və siyasi baxımdan cavab verməyə məcbur edəcəyəm.”

Cənubi Koreya Konstitusiya Məhkəməsinin sabiq Prezident Yun Sok Yolu vəzifədən kənarlaşdırmasından sonra 3 iyun tarixində vaxtından əvvəl prezident seçkiləri keçirəcək.

JoongAng Ilbo qəzetinin son rəy sorğusuna əsasən, Demokrat Partiyasının namizədi Li Cae-myong 47 faiz dəstəklə seçki yarışına başçılıq edir. Onu 23 faizlə Han, 13 faizlə Kim və 4 faizlə İslahat Partiyasının namizədi Li Cun-sok izləyir.