İsrailin Xarici işlər naziri Gideon Saar Fransanın Fələstin dövlətini tanımaq planını pisləyib. Saar bu addımın "terrorun mükafatı" olacağını müdafiə edib.
Xatırladaq ki, Fransa prezidenti Emmanuel Makron aprelin 9-da "France 5" telekanalında yayımlanan müsahibəsində bildirib ki, Fransa Fələstin dövlətini tanımağa hazırlaşır və qərar iyun ayında Səudiyyə Ərəbistanının birgə ev sahibliyi etdiyi beynəlxalq konfransda elan edilə bilər.
Gideon Saar deyib: “Hamımıza məlum olduğu kimi reallıq budur ki, hər hansı bir ölkənin ‘birtərəfli tanınması’ xəyali Fələstin dövlətinə mükafat vermək və HƏMAS-ı gücləndirmək mənası daşıyır. Bu cür addımlar sülh, təhlükəsizlik və sabitliyi təmin etməyəcəkdir. Əksinə bu, onları daha da uzaqlaşdıracaq”.
Makron isə "Biz Fələstini tanımaq üçün addım atmalıyıq və bunu yaxın aylarda edəcəyik" deyib. O, iyun ayında Nyu-Yorkda keçirilməsi planlaşdırılan və iki dövlət həllinin həyata keçirilməsinin müzakirə olunacağı konfransın dönüş nöqtəsi ola biləcəyini bildirib.
Makronun bu bəyanatları İsrailin 2023-cü ilin oktyabrından bu yana 50 mindən çox insanı öldürdüyü Qəzzada müharibə fonunda bölgədəki böhranın siyasi həllinə çağırışların artdığı bir vaxta təsadüf edir.
Fransa lideri daha əvvəl 2024-cü ilin fevralında verdiyi açıqlamada Fələstin dövlətinin tanınmasının Fransa üçün “tabu” olmadığını, əksinə, mənəvi və siyasi bir öhdəlik olduğunu bildirmişdi. "Bu, çox uzun müddətdir əzilən fələstinlilərə borcumuzdur. Ayrıca olaraq əsrin ən dəhşətli antisemit qırğını yaşayan israillilərə, xaos və qisas toxumu səpənlərdən azad olmaq istəyən bölgəyə borcumuzdur" deyib.
Fələstini tanıyan ölkələrin sayı artır
Birləşmiş Millətlər Təşkilatına üzv olan 193 ölkədən 147-si hazırda Fələstini müstəqil dövlət kimi tanıyır. Keçən may ayında İspaniya, İrlandiya və Norveç bu ölkələrə qoşularaq onu tanıyan Avropa İttifaqı ölkələrinin sayını 10-a çatdırdı. Bu ölkələrdən başqa Bolqarıstan, Cənubi Kıbrıs Rum Rəhbərliyi, Malta, Macarıstan, Polşa, İsveç və Rumıniya da Fələstini tanıyıb.
Avropa ölkələrindən başqa Baham adaları, Trinidad və Tobaqo, Yamayka və Barbados kimi ölkələr də Fələstin dövlətini rəsmən tanıyıblar.
