ABŞ Prezidenti Donald Tramp administrasiyasının smartfonlar və çiplər kimi elektron məhsullara tətbiq edilən tariflərdən azad olunduğu barədə yayılan xəbərləri təkzib edib. Tramp ötən həftə sonu bəzi istehlakçı texnologiyası məhsullarının cavab tariflərindən azad ediləcəyinə dair iddialara baxmayaraq, bu məlumatların həqiqəti əks etdirmədiyini bildirib.
Rəsmi "Truth Social" platformasında paylaşım edən Donald Tramp deyib:
"Heç kim, xüsusilə də Çin, tariflərdən azad deyil. Bu məhsullar hazırda qüvvədə olan 20%-lik fentanil tariflərinə tabedir. Sadəcə olaraq, bu məhsullar başqa bir gömrük rüsumu kateqoriyasına daxil edilib. Dezinformasiya yayanlar bu həqiqəti yaxşı bilirlər, lakin bunu ictimaiyyətlə bölüşməkdən imtina edirlər. Bizim apardığımız araşdırmalar göstərdi ki, bu məhsulları ABŞ-da istehsal etməliyik və Çin kimi ölkələrə möhtac olmamalıyıq."
ABŞ Gömrük və Sərhəd Mühafizəsi cümə günü yaydığı bəyanatda bildirib ki, Çin məhsullarına tətbiq edilən 145%-lik tariflər hazırda elektron məhsulları əhatə etmir.
Lakin Ticarət Naziri Hovard Lutnik bazar günü verdiyi açıqlamada bu vəziyyətin daimi olmadığını vurğulayıb. O bildirib ki, bu istisna yalnız müvəqqətidir və əslində daha geniş bir strategiyanın tərkib hissəsidir. Onun sözlərinə görə, qarşıdakı bir və ya iki ay ərzində bu məhsullar da yeni tariflərə tabe olacaq.
Çin başqa istiqamətlərə yönəlir
Çin qlobal iqtisadi qeyri-sabitlikdən ehtiyat edən ölkələri cəlb edərək, özünü sabit və etibarlı alternativ kimi təqdim etməyə çalışır. Prezident Şi Cinpin bazar ertəsi Cənub-Şərqi Asiyaya səfərə çıxıb. Səfər çərçivəsində o, Vyetnam, Malayziya və Kamboca kimi ölkələrin liderləri ilə danışıqlar aparır.
Donald Tramp administrasiyasının tətbiq etdiyi tariflərin təsiri və siyasət dəyişikliyi ABŞ iqtisadiyyatında ciddi dalğalanmalara səbəb olub. İnvestorlar dövlət istiqrazlarını satmağa başlayıb, nəticədə dolların dəyəri azalıb və istehlakçılar arasında iqtisadi inam zəifləyib.
Ağ Ev isə bu aqressiv siyasətin nəticə verdiyini iddia edir. Rəsmilərin sözlərinə görə, bir çox ölkə 90 günlük fasilə başa çatmamış ticarət razılaşması əldə etmək məqsədilə danışıqlara başlayıb.
"Biz gecə-gündüz çalışırıq, sənədləri paylaşır, təkliflər alır və bu ölkələrlə müntəzəm hesabat mübadiləsi aparırıq",- deyə ABŞ rəsmisi Qrer deyib.
