İyun ayından bəridir Pentaqon regionda raket əleyhinə müdafiə sistemlərini gücləndirir və hazırda ABŞ-ın İsrail üçün raket ehtiyatının tükənməsi ilə bağlı narahatlıqlar artır.

ABŞ rəsmisi bildirib ki, hazırkı münaqişə davam edərsə, İsrailin İrandan gələ biləcək uzaqmənzilli ballistik raketlərə qarşı əsas müdafiəsi olan "Arrow" ehtiyatı azalmaqdadır.

ABŞ rəsmisi iyunun 18-də "Wall Street Journal"a bildirib ki, iyun ayında münaqişə intensivləşəndən bəri Pentaqon regionda əlavə raket əleyhinə müdafiə sistemləri yerləşdirib, lakin ABŞ-ın raket əleyhinə müdafiə sistemlərinin sürətlə tükənməkdə olduğuna dair narahatlığı artmaqdadır.

Vaşinqton uzun müddətdir ki, müdafiə sistemləri üzərindəki təzyiqdən xəbərdardır və İsrailin müdafiəsini qurudan, dənizdən və havadan gücləndirir.

Strateji və Beynəlxalq Araşdırmalar Mərkəzinin Raketdən Müdafiə Layihəsinin direktoru Tom Karako WSJ-yə deyib: “Nə ABŞ, nə də israillilər bütün günü oturub raketlərin qarşısını almağa davam edə bilməzlər”.

Raketlərə qarşı əsas müdafiə olan "Arrow" istehsalçısı "Israel Aerospace Industries" bildirilən çatışmazlıq barədə şərh verməkdən imtina edib.

İsrail ordusu qısa açıqlama verərək istənilən ssenariyə hazır olduğunu bildirib.

"Təəssüf ki, biz döyüş sursatı ilə bağlı şərh verə bilmərik", - İsrail ordusu bildirib.

İranın raket imkanları

İsrailin İranın öz ərazisindəki strateji və nüvə aktivlərinə birbaşa hücumlara başlamasından sonra Tehran raket istehsalını yenidən aktivləşdirib.

ABŞ müdafiə naziri Pit Heqsetin keçmiş baş müşaviri Den Kaldvell hesab edir ki, İranın İsraili vura biləcək 2000-ə yaxın raketi var.

İran bundan əvvəl müxtəlif mənzillərə malik on yeni raket növü elan edib, lakin bu raketlərin dəqiq sayı və uçuş məsafəsi qeyri-müəyyən olaraq qalır.

ABŞ kəşfiyyatı 2024-cü ilə qədər İranın regionun “ən böyük ballistik raket arsenalına” sahib olacağını və onun dəqiqliyini və öldürücülüyünü artırdığını bildirib.

İran 2013-cü ildə keçirilən parad zamanı 2000 kilometrdən çox məsafə qət edə bilən raketlərini nümayiş etdirib.