Türkiyənin Aviasiya, Kosmonavtika və Texnologiya Festivalı “TEKNOFEST”in son mərhələsi Şimali Kipr Türk Cümhuriyyəti (ŞKTC) Lefkoşada keçirilir. 1 may tarixində başlayan festival, ŞKTC Prezident Administrasiyasının himayəsi altında paytaxt Lefkoşadakı “Ercan” Hava Limanında təşkil edilib.
Burada müxtəlif müsabiqələr, hava şouları, sərgi və seminarlardan ibarət zəngin proqramlar təqdim olunub. Tədbirin ilk günü böyük hava şoularından əlavə, 5G texnologiyasına ait sərgi də keçirilib. Dörd gün davam edən tədbirin ilk günündə təxminən 62.000 ziyarətçi olub.
Türkiyənin mobil operatoru “Turkcell” tərəfindən həyata keçirilən 5G testində yeni nəsil avtonom dəniz vasitəsi 5G bağlantısı ilə uzaqdan idarə edilib. Bu təşəbbüs “Turkcell”in pilotsuz dəniz vasitəsində ilk 5G sınağı olub.
Texnologiya və ruh birlikdə
Uğurlu sınaqdan sonra danışan “Turkcell”in baş direktoru Ali Taha Koç şirkətin innovativ əlaqə texnologiyalarında qabaqcıl olmağa davam etdiyini bildirib.
Türkiyə Texnologiya Komandası Fondu (T3 Fondu) və Türkiyə Sənaye və Texnologiya Nazirliyi tərəfindən təşkil edilən “TEKNOFEST” 2018-ci ildən etibarən onlarla dövlət qurumu, özəl sektor tərəfdaşları və universitetlərin dəstəyi ilə hər il keçirilir.
Anadolu Agentliyi festivalın qlobal kommunikasiya tərəfdaşı kimi xidmət göstərir. Tədbir cüt illərdə Türkiyənin müxtəlif şəhərlərində, tək illərdə isə İstanbulda keçirilsə də, ŞKTC 2022-ci ildə Azərbaycandan sonra “TEKNOFEST”ə ev sahibliyi edəcək ikinci beynəlxalq məkan olub.
Qeyd edək ki, sonuncu dəfə “TEKNOFEST” keçən il Türkiyənin cənubundakı Adana şəhərində baş tutaraq təxminən 1,1 milyon ziyarətçiyə ev sahibliyi etmişdi.
