Rusiyanın özəl hərbi şirkəti “Vaqner” Malidən çıxacağını elan edib və Qərbi Afrika ölkəsində üç ildən artıq davam edən əməliyyatlarına son qoyaraq bildirib: “Biz yerli vətənpərvərlərə güclü və intizamlı ordu yaratmaqda kömək etdik ki, onlar öz torpaqlarını müdafiə edə bilsinlər. Bütün regional şəhərlər qanuni hakimiyyətin nəzarətinə qaytarılıb.

  Biz illərdir mülki əhalini qorxudan minlərlə terrorçu və başçılarını məhv etdik”.

  Sahel bölgəsində yerləşən Mali 2012-ci ildən bəri üsyanlarla üzləşir.

Rusiyanın “Afrika korpusu” “Vaqner”i əvəz edəcək

  Malidəki hərbi xunta Fransa və digər tərəfdaşlarla əlaqələri kəsdikdən sonra Rusiyadan dəstək istəmişdi.

  “Vaqner” çıxsa da, Rusiya Qərbi Afrika ölkəsində iştirakını davam etdirəcək və dövlət nəzarətində olan paramilitar qüvvəsi “Afrika korpusu” ilə fəaliyyət göstərəcək.

  2025-ci ilin əvvəlində Mali, Burkina Faso və Niger - hərbi idarəetmə altında olan bu üç ölkə Qərbi Afrika regional bloku ECOWAS-dan rəsmi olaraq ayrılıblar. Onlar öz bloklarını - Sahel Dövlətləri Alyansını yaradıblar.