İrandan atılan raketlər İsrailin bir neçə bölgəsinə düşərək yanğınlara səbəb olub və binalara ciddi ziyan vurub. Hücum zamanı İsrailin hava hücumundan müdafiə sistemləri raketlərin qarşısını tam ala bilməyib.

İsrail Ordusu Radiosunun verdiyi məlumata görə, İrandan atıldığı ehtimal edilən bir neçə raket İsrail ərazisinə düşüb. Ordu raketlərin dəqiq olaraq hansı bölgələrə düşdüyünü açıqlamasa da, “Israel Hayom” qəzeti Qüds və Tel-Əviv yaxınlığındakı Şaron bölgəsinə azı iki raketin düşdüyünü yazıb.

‘‘Kanal 12’’ telekanalı raket zərbələrinin İsrailin mərkəzində yerləşən bir binaya ziyan vurduğunu və yanğınsöndürənlərin yanan 20 avtomobilə müdaxilə etdiyini bildirib. Raket parçalarının İsrailin şimalında yerləşən bir binaya düşdüyü qeyd edilib.

Cümə günü İsrailin İranın bir neçə hərbi və nüvə obyektinə endirdiyi hava zərbələrinə cavab olaraq Tehran raket hücumlarına başlayıb. Bu hücumlar nəticəsində bölgədə gərginlik daha da artıb.

İsrail rəsmiləri İranın raket zərbələri nəticəsində azı 24 nəfərin öldüyünü, yüzlərlə insanın isə yaralandığını açıqlayıb. İran tərəfi isə İsrailin hücumları nəticəsində ən azı 224 nəfərin öldüyünü, 1000-dən çox insanın yaralandığını bildirib.