Beynəlxalq Miqrasiya Təşkilatı (IOM) məcburi köçkün düşmüş fələstinlilərə sığınacaq yardımının hazır olduğunu bildirib və İsraildən giriş məntəqələrinin açılmasını istəyib.

Birləşmiş Millətlər Təşkilatının Humanitar Məsələlər üzrə Koordinasiya Ofisinin (OCHA) məlumatlarına istinadən Beynəlxalq Miqrasiya Təşkilatı (IOM) Qəzzada evlərin 90 faizindən çoxunun dağıldığını və ya zədələndiyini açıqlayıb. İsrailin bölgədə davam edən müharibəsi fələstinli mülki əhalini daha dərin humanitar fəlakətə sürükləyir.

Təşkilat aprelin 23-də "X" platformasında İsrailə çağırış edərək, "Getmək üçün təhlükəsiz yer olmadığı üçün ailələr təhlükəli dağıntılara sığınmağa məcburdurlar" ifadəsini işlədərək, "IOM-un sığınacaq yardımı hazırdır - keçid məntəqələri DƏRHAL açılmalıdır" deyib.

İsrail martın 2-dən Qəzzaya giriş məntəqələrini bağlayıb, müharibənin davam etdiyi bölgədə aclıq xəbərlərinə baxmayaraq, əsas ehtiyacların bölgəyə daxil olmasına mane olub.

Yanvarın 19-da bağlanmış atəşkəs və əsir mübadiləsi razılaşmasını birtərəfli qaydada pozan İsrail martın 18-də Qəzzaya hücumlarını bərpa edib.

İsrail indiyədək əksəriyyəti qadın və uşaq olmaqla 51.300-dən çox fələstinlini qətlə yetirib. Bu rəqəm sonradan 62 min olaraq yenilənib.

Bölgənin böyük hissəsini də xarabaya çevirən İsrail ayrıca, blokadada olan bölgənin demək olar ki, bütün əhalisini didərgin salıb.

Keçən ilin noyabrında Beynəlxalq Cinayət Məhkəməsi Netanyahu və keçmiş müdafiə naziri Yoav Qallantın Qəzzada hərbi cinayətlər və insanlığa qarşı cinayətlər törətdiyinə görə həbs edilməsinə order verib.

İsrail həmçinin Qəzzada apardığı müharibəyə görə Beynəlxalq Ədalət Məhkəməsində soyqırım işi ilə qarşı-qarşıyadır.