Rusiya prezidenti Vladimir Putin Ukrayna qoşunlarının bölgədən çıxarılmasından həftələr sonra könüllü təşkilatlar və rəsmilərlə görüşmək üçün Kursk vilayətinə gəlib.
Onun vilayət azad edildikdən sonra ilk səfəridir.
Kreml bildirib ki, Putin bir gün əvvəl Ukrayna ilə sərhəddə yerləşən Kurska səfər edib.
Ukrayna qüvvələri 2024-cü ilin avqustunda Kiyevin təxminən 2,5 illik müharibədə ən böyük transsərhəd hücumunun bir hissəsi olaraq Kursk bölgəsinə qəfil basqına başlayıb, lakin 9 ay sonra Rusiya qoşunları tərəfindən dəf edilib.
Ukrayna onların ərazidən çıxarıldığını təsdiqləməyib.
Putin hələ tikintisi davam edən Kursk Atom Elektrik Stansiya-2-yə baş çəkib və seçilmiş könüllülərlə mətbuata qapalı keçirilən görüşdə çıxış edib. O, həmçinin qubernator səlahiyyətlərini icra edən Aleksandr Xinşteynə çatdırıb ki, Kreml hələ də evlərinə qayıda bilməyən köçkün ailələrinə aylıq ödənişlərin davam etdirilməsi ideyasını dəstəkləyir.
Rusiyanın 2022-ci il hücumundan cəmi iki il sonra Ukrayna ən cəsarətli əməliyyatını avqustun 6-da başlayıb, ağır pilotsuz aparatlarının dəstəyi və Qərb silahları ilə Rusiya sərhədini keçərək Kursk bölgəsinə keçib.
Ukrayna qüvvələri əməliyyatın pik nöqtəsində Kurskda təxminən 1400 kvadrat kilometr əraziyə nəzarət etdiyini iddia edib.
Rusiya Ukraynanın təlim düşərgəsini hədəfə alıb
Digər tərəfdən, Ukrayna Milli Qvardiyası mayın 21-də bildirib ki, mayın 20-də Rusiyanın Ukraynadakı hərbi poliqona raket hücumu nəticəsində 6 əsgər ölüb, ən azı 10 nəfər yaralanıb. Açıqlamada bölük komandirinin işdən çıxarıldığı da qeyd olunub.
Rusiya Müdafiə Nazirliyi mayın 20-də Ukraynanın şimal-şərqində, Rusiya sərhədinə yaxın Sumı bölgəsində təlim düşərgəsinə raket hücumu nəticəsində 20-si təlimatçı daxil olmaqla 70-ə qədər ukraynalı əsgərin həlak olduğunu bildirib.
Ukrayna Milli Qvardiyasının bəyanatında daxili araşdırmaya başlanıldığı və lazımi məlumatların hüquq-mühafizə orqanları ilə paylaşıldığı bildirilib.
“İstintaq müvafiq qərarlar çıxaran bütün şəxslərin əməllərinə hüquqi qiymət verəcək”, - deyə məlumatda bildirilib.
Daha əvvəlki sarsıdıcı hücumlardan sonra Ukrayna hərbi təlim düşərgələrində mümkün səhlənkarlıqla bağlı araşdırmalara başlayıb.
