Çin ordusu çərşənbə axşamı Tayvan ətrafında genişmiqyaslı hərbi təlimlərə başladığını elan edib və özünü idarə edən adaya müstəqillik cəhdindən əl çəkməsi üçün bir daha xəbərdarlıq edib.
Xalq Azadlıq Ordusunun Şərq Komandanlığının sözçüsü Şi Yi təlimlərə hərbi dəniz, hava, quru və raket qüvvələrinin cəlb edildiyini bildirib.
Pekin, Tayvanı öz ərazisi hesab edir və lazım gələrsə, güc tətbiq edərək adanı öz nəzarətinə keçirə biləcəyini iddia edir. Lakin Tayvanda ictimai rəy bu məsələdə ikiyə bölünür. Bəzi tayvanlılar müstəqilliklərini və demokratik statuslarını qoruyub saxlamağı, digərləri isə Çinlə birləşməyi dəstəkləyir.
Tayvanın Müdafiə Nazirliyi bazar ertəsi səhər saat 6-dan çərşənbə axşamı səhər saat 6-ya qədər 24 saat ərzində adanı əhatə edən sahillərdə 19 Çin hərbi gəmisini aşkar etdiyini bildirib. Nazirlik həmçinin şənbə günündən bəri Çinin Shandong təyyarədaşıyan gəmisinin hərəkətlərini izlədiyini və təyyarədaşıyan qrupun Tayvanın özünün təyin etdiyi hava hücumundan müdafiə identifikasiya zonasına daxil olduğunu qeyd edib.
Tayvanın Müdafiə Naziri Vellinqton Koo deyib: "Tayvan ətrafındakı bu hərəkətlər açıq şəkildə regional sülh və sabitliyi pozur". O, həmçinin bildirib ki, təlimlərə nəzarət etmək üçün mərkəzi cavab qrupu yaradılıb.
Çin Sahil Xidməti çərşənbə axşamı Tayvan ətrafında patrul xidməti həyata keçirdiyini açıqlayıb.
Təlimlər Pekinin martın ortalarında Tayvana böyük pilotsuz təyyarə və gəmi göndərməsindən cəmi iki həftə sonra keçirilir.
Çinin Tayvan məsələləri üzrə İdarəsi təlimlərin birbaşa Tayvan prezidenti Lai Çinq-teyi hədəf aldığını açıqlayıb. "Lai Çinq-te israrla 'Tayvanın müstəqilliyi' ideyasını müdafiə edir, Çini 'düşmən xarici güc' adlandırır və '17 bəndlik strategiya' adlandırılan strategiya təklif edərək anti-Çin əhval-ruhiyyəsini qızışdırır", - deyə məlumatda bildirilir.
Lai mart ayında Tayvanın milli təhlükəsizliyinin gücləndirilməsinə yönəlmiş 17 bəndlik strategiyanı açıqlayıb. Bu strategiyaya hərbi məhkəmələrdə casusluq işlərinin baxılması və Çin vətəndaşlarının daimi yaşayış icazəsi almasını çətinləşdirən immiqrasiya qaydaları daxildir.
Çin Xalq Azadlıq Ordusu (PLA) keçirdiyi hərbi təlimləri elan etmək üçün bir sıra videolar yayımlayıb. Bu videolardan birində Lai Tayvanı "zəhərləyən" yaşıl parazit kimi təsvir edilmişdir.
Pekin, Tayvanın müdafiəsini və mənəviyyatını zəiflətmək üçün adaya hər gün döyüş təyyarələri və dəniz gəmiləri göndərir. Lakin adanın 23 milyon əhalisinin böyük əksəriyyəti Çinin Tayvan üzərində suverenlik iddialarını rədd edir. Son illərdə Pekin bu cür hərbi fəaliyyətlərin miqyasını genişləndirərək təkcə döyüş təyyarələri deyil, həm də təyyarə, pilotsuz təyyarələr və gəmilərdən ibarət donanma göndərib.
Çin Milli Müdafiə Universitetinin professoru Zanq Chi CCTV-yə bildirib ki, Çin Xalq Azadlıq Ordusu öz dəniz və hava qüvvələri ilə dəniz və quru hücumlarını sınaqdan keçirir. "Bu təlimlərin əsas məqsədi Tayvan hakimiyyətinin bəzi mühüm hədəflərinə çoxtərəfli dəqiq zərbələr endirmək qabiliyyətimizi yoxlamaqdır", - deyə o vurğulayıb..
Çindən artan təhlükə ilə üzləşən Tayvan, ABŞ-dan yeni raketlər, təyyarələr və digər silahlar sifariş edir, eyni zamanda öz müdafiə sənayesini gücləndirir.
Tayvan və Çin 76 il əvvəl vətəndaş müharibəsi zamanı ayrıldı, lakin son illərdə iki hökumət arasında əlaqə kəsildiyi üçün gərginlik yenidən alovlandı.
