Vaşinqton hesab edir ki, İrana partlayıcı bomba istehsal etmək üçün ən azı daha iki və ya üç il lazımdır, İsrail isə təhlükənin təcili olduğunu iddia edir.
ABŞ və İsrailin İranın nüvə silahı hazırlamağa nə dərəcədə yaxın olması ilə bağlı kəskin fərqli baxışları var.
İyunun 17-də mətbuatda dərc olunmuş məlumatlara görə, ABŞ kəşfiyyatının qiymətləndirmələri Tehranın bu məqsədə çatması üçün hələ illər çəkəcəyini göstərir, Təl-Əviv isə təhlükənin yaxın olduğunu iddia edir.
CNN-nin xəbərinə görə, İsrailin Baş naziri Benyamin Netanyahu İranın sürətlə silahlanmaya doğru irəlilədiyini və İsrailin İranın nüvə və hərbi infrastrukturuna bir sıra hücumlar təşkil etdiyini bildirib.
Bununla belə, məsələ ilə bağlı məlumatlı olan dörd mənbə CNN-ə bildirib ki, ABŞ kəşfiyyatı hazırda İranın nüvə bombası hazırladığına inanmır və belə bir silahın istehsalı və yerləşdirilməsi üçün ən azı iki-üç il vaxt lazım olduğunu təxmin edir.
Son zərbələr Natanz kimi nüvə obyektlərinə ziyan vurdu, lakin ciddi şəkildə qorunan Fordo zənginləşdirmə obyektinə zərbə endirilmədi. Müdafiə ekspertləri bildiriblər ki, Fordo obyektinə ziyan vurmaq üçün İsrailin müəyyən ABŞ silahlarına və hava dəstəyinə ehtiyacı olacaq.
"İsrail bu nüvə obyektlərinin üzərindən uça, onları sıradan çıxara bilər, lakin əgər siz həqiqətən onları dağıtmaq istəyirsinizsə, ya ABŞ-ın hərbi müdaxiləsinə, ya da müqaviləyə ehtiyacınız var", - Brett McGurk bildirib.
Kəşfiyyatın dedikləri Trampın vecinə də deyil
Fərqli qiymətləndirmələr Tramp administrasiyası üçün dilemma yaradıb. Administrasiya gərginliyin qarşısını almağa çalışır, eyni zamanda mümkün cavab tədbirləri görməyə hazırlaşır. Milli Kəşfiyyatın direktoru Tulsi Qabbar martın əvvəlində deyib ki, kəşfiyyat komandası əmindir ki, İran nüvə silahı istehsal etmir.
Tramp Qabbarın bəyanatını rədd edərək, "Onun nə dediyi mənim üçün əhəmiyyətsizdir - məncə, İran bu məqsədə çox yaxındır" deyib.
Qeyd edək ki,İsrailin iyunun 13-də İranın bir neçə məntəqəsinə, o cümlədən hərbi və nüvə obyektlərinə hava zərbələri endirməsindən sonra regional gərginlik artıb. Bu hücumlar Tehranı cavab zərbələri endirməyə vadar edib.
İsrail rəsmiləri İranın raket zərbələri nəticəsində ən azı 24 nəfərin öldüyünü, yüzlərlə insanın yaralandığını, İran isə İsrailin zərbələri nəticəsində ən azı 224 nəfərin öldüyünü və 1000-dən çox insanın yaralandığını bildirib.
