Müdafiə Nazirliyinin sözçüsü Türkiyə Silahlı Qüvvələrinin mümkün miqrasiya hərəkətlərinə qarşı proaktiv yanaşma ilə bütün lazımi təhlükəsizlik tədbirlərini görməyə davam edəcəyini bildirib.
Türkiyə Milli Müdafiə Nazirliyi iyunun 19-da verdiyi açıqlamada İsrailin İrana hücumları ilə başlayan qarşıdurmalardan sonra indiyədək qeyri-qanuni sərhədi keçmə cəhdlərində artım olmadığı vurğulanıb.
Nazirliyin sözçüsü Zeki Aktürk Türkiyə Silahlı Qüvvələrinin mümkün miqrasiya hərəkətlərinə qarşı bütün lazımi təhlükəsizlik tədbirlərini fəal şəkildə almağa davam edəcəyini bildirib və bu mövzuda qətiyyətli olduğunu ifadə edib.
Aktürk Ankarada keçirdiyi mətbuat konfransında bildirib ki, son bir həftədə İraq və Suriyanın şimalındakı sığınacaqlarından qaçan daha 5 PKK terrorçusu təslim olub.
Aktürk həmçinin "Pəncə-Kilid" əməliyyatı başda olmaqla əməliyyat bölgələrində aşkarlanan terrorçulara aid mağara və sığınacaqlardan ələ keçirilən çoxlu silah, sursat və müxtəlif materialların istifadəyə yararsız hala salındığını bildirib.
Milli Müdafiə Nazirliyinin sözçüsü Türkiyə Silahlı Qüvvələrinin ölkənin əmin-amanlığı, təhlükəsizliyi və sabitliyi üçün əməliyyatlarını, axtarış-yoxlama və sərhəd təhlükəsizliyi fəaliyyətlərini davam etdirdiyini deyib.
Qeyd edək ki, PKK terrorçuları Türkiyə ərazisinə hücumlar planlaşdırmaq üçün tez-tez İraqın şimalında Türkiyə sərhədi yaxınlığında gizlənirlər.
Türkiyə son illərdə PKK terror təşkilatına qarşı həm ölkə daxilində, həm də xaricdə uğurlu əməliyyatlar həyata keçirib. Bu proses zamanı təşkilatı tərk edərək təslim olan PKK-lıların sayında artım müşahidə olunub. Təslim olanlar Türkiyənin cəza məcəlləsindən faydalana bilərlər.
PKK 40 ilə yaxındır Türkiyəyə qarşı həyata keçirdiyi terror aktlarında aralarında qadın, uşaq və körpə olmaqla 40 mindən çox insanın ölümünə görə məsuliyyət daşıyır. PKK Türkiyə, ABŞ və Aİ tərəfindən terror təşkilatı kimi tanınır.
İsrail bölgəni xaosa sürükləyir
Kontr-admiral Aktürk “İranın nüvə proqramı ilə bağlı danışıqlara diqqət yetirdiyi bir dövrdə İsrail qonşumuz İrana qarşı beynəlxalq hüquqa zidd olan hücuma keçərək regional sabitliyi və sülhü yenidən riskə atdı” deyib.
İsrailin İrana hücumlarını pisləyən Aktürk qeyd edib ki, İsrailin Qəzzaya, Livana və son olaraq İrana qarşı beynəlxalq hüquqa məhəl qoymayan hücumları onun münaqişələri yaymaq niyyətini açıq şəkildə nümayiş etdirir.
Aktürk İsrailin sərhəd tanımayan aqressiv mövqeyinin bölgəni xaosa sürüklədiyini və hücumlarına dərhal son qoymasının vacibliyini də vurğulayıb.
Milli Müdafiə Nazirliyindəki mənbələr İsrail-İran münaqişəsinə toxunaraq bildiriblər ki, İsrail münaqişəni daha da gərginləşdirəcək ifadələrdən və hücumlardan dərhal əl çəkməlidir.
Mənbələr İrana qarşı hava hücumlarının ilk günündə İsrail təyyarələrinin Türkiyə hava məkanını pozması xəbərlərinin doğru olmadığını və bütün hava hərəkətlərinin əvvəldən diqqətlə izləndiyini vurğulayıb.
"İsrail reaktivlərinin mümkün hava məkanını pozması halında xəbərdarlıq təyyarələri havaya qalxaraq Türkiyə hava məkanında patrul etməyə başlayır və Milli Müdafiə Nazirliyindəki mənbələr İsrailin hava hücumlarının başlaması ilə hava məkanını və sərhədləri qorumaq üçün tədbirlərin artırıldığını bildirib", deyə mənbələrqeyd edib.
Eyni mənbələr İsrailin Qəzza, Livan, Suriya və İrana qarşı təcavüzkar siyasətinin regionda onsuz da kövrək olan tarazlığı daha da pozduğunu bildirib.
Dünyanın ən müasir, etibarlı və qüdrətli ordularından biri olan Türkiyə Silahlı Qüvvələrinin hazırda və gələcəkdə ölkəni və xalqını müdafiə etmək əzmində və qadir olduğu vurğulanıb.
Türkiyənin hava hücumundan müdafiəsi
Nazirlik mənbələri Türkiyənin hava və raketdən müdafiə sistemlərini çoxqatlı və hərtərəfli sistem olaraq qoruyub saxlamaq üçün səylərinin davam etdiyini bildirib.
Yerli radar və hava hücumundan müdafiə sistemləri ilə yanaşı, komanda və idarəetmə imkanlarını gücləndirmək üçün səylər davam edir. Bildirilib ki, hava hücumundan müdafiə bölmələri və silah sistemlərinin ən yüksək hazırlıq səviyyəsində saxlanılması üçün tədbirlər davam etdirilir.
Sərhədlərinin təhlükəsizliyini təmin etmək və mümkün humanitar böhranlara cavab vermək üçün Türkiyənin müdafiə qabiliyyətinin ən yüksək səviyyədə saxlandığı, müvafiq dövlət qurumları ilə koordinasiyanın aparıldığı vurğulanıb.
Nazirlik mənbələri həmçinin Türkiyənin regional sabitliyi dəstəkləyən və humanitar öhdəliklərini yerinə yetirərək, nəzarətli və nizamlı şəkildə hərəkət etdiyini bildirib.
