Türkiyə 44 ölkə ilə birlikdə İsrailin Fələstindəki əməliyyatları ilə bağlı Beynəlxalq Ədalət Məhkəməsinin dinləmələrində iştirak edir.

Diplomatik mənbələrdən verilən məlumata görə, Türkiyənin xarici işlər nazirinin müavini Nuh Yılmaz aprelin 30-da Beynəlxalq Ədalət Məhkəməsində (UAD) şifahi bəyanatla çıxış edəcək.

Mənbələr Nuh Yılmazın İsrailin işğal olunmuş Fələstin torpaqlarında BMT, beynəlxalq təşkilatlar və üçüncü ölkələr qarşısındakı öhdəlikləri ilə bağlı məsləhətləşmə prosesi çərçivəsində danışacağını bildirib.

2024-cü il dekabrın 19-da BMT Baş Assambleyası Beynəlxalq Ədalət Məhkəməsindən İsrailin Qüdsün şərqi də daxil olmaqla işğal olunmuş Fələstin ərazilərindəki hərəkətlərinin hüquqi nəticələri barədə məsləhətçi rəy verməsini tələb edən qətnamə qəbul edib.

Qərarda əsas diqqət İsrailin beynəlxalq hüquq çərçivəsində götürdüyü öhdəliklərə yönəlib.

Türkiyə də daxil olmaqla ümumilikdə 52 ölkə qərarı dəstəkləyib.

Qərardan sonra Beynəlxalq Ədalət Məhkəməsi BMT-ni, üzv dövlətləri və Fələstin Dövlətini (müşahidəçi statusu ilə) yazılı və şifahi bəyanatlar təqdim etməyə dəvət edib.

Türkiyə yazılı bəyanatını fevralın 27-də təqdim edib.

Ümumilikdə 45 ölkə və beynəlxalq təşkilat yazılı bəyanat göndərib.

İslam Əməkdaşlıq Təşkilatı, Ərəb Liqası və Afrika İttifaqının da rəsmi müraciətlərdən sonra işə qoşulmalarına icazə verilib.

UAD şifahi dinləmələri aprelin 28-dən mayın 2-nə təyin edib.

Dinləmələrdə 44 ölkə və təşkilatın şifahi bəyanatla çıxış edəcəyi gözlənilir.

Xarici işlər nazirinin müavini Yılmaz Türkiyənin mövqeyini bu gün yerli vaxtla saat 16:00-da (GMT 13:00) açıqlayacaq.

Qeyd edək ki, Beynəlxalq Ədalət Məhkəməsi BMT-nin əsas məhkəmə orqanıdır.

Məhkəmə dövlətlər arasında hüquqi mübahisələri həll edir və BMT Baş Assambleyası və ya BMT-nin digər səlahiyyətli orqanları tərəfindən təqdim olunan hüquqi məsələlər üzrə məsləhət xarakterli rəylər verir.

BMT-nin bütün üzv dövlətləri BƏƏ-nin Nizamnaməsinin tərəfləridir və Məhkəmə qarşısında iş qaldıra bilərlər.

Bununla belə, yalnız BMT-nin müəyyən orqanları və qurumları məsləhət rəyi tələb edə bilər.