İran Böyük Britaniya, Fransa və Almaniyanın Beynəlxalq Atom Enerjisi Agentliyinin rəhbəri Rafael Qrossiyə qarşı tənqidlərini rədd edib.
Məlumata görə, Böyük Britaniya, Fransa və Almaniya birgə bəyanat yayaraq rəsmi Tehranı BAEA işçilərinin təhlükəsizliyini təmin etməyə çağırıb. Bəyanatda deyilir:
“Biz İran hakimiyyətini BAEA ilə əməkdaşlığı dayandıracaq hər hansı addımdan çəkinməyə çağırırıq. İranı hüquqi öhdəliklərinə uyğun olaraq əməkdaşlığı bərpa etməyə və BAEA işçilərinin təhlükəsizliyini təmin etmək üçün bütün zəruri addımları atmağa çağırırıq.”
İran Xarici İşlər Nazirliyinin sözçüsü İsmayıl Bəqai isə İsrail və ABŞ-ın İranın nüvə obyektlərinə son hücumlarından sonra Qərbin gözləntilərinin real olmadığını əsas gətirərək bu çağırışı rədd edib.
“Bir neçə gün əvvəl İranın dinc nüvə obyektlərinə hücum edilib. Onlar bizdən necə BAEA əməkdaşlarının təhlükəsizliyini təmin etməyimizi gözləyirlər?” – deyə İsmayıl Bəqai vurğulayıb.
İran və BMT-nin nüvə orqanı arasında gərginlik, Beynəlxalq Atom Enerjisi Agentliyinin (BAEA) direktorlar şurasının bu ayın əvvəlində İranı Nüvə Silahlarının Yayılmaması Müqaviləsindən (NPT) irəli gələn öhdəliklərini pozmaqda ittiham edən qətnamə qəbul etməsindən sonra artıb.
İran Xarici İşlər Nazirliyinin sözçüsü İsmayıl Bəqai Konstitusiya Keşikçiləri Şurası tərəfindən təsdiqlənən və BAEA ilə əməkdaşlığı dayandırmağa məcbur edən yeni qanuna diqqət çəkib. O, həmçinin BMT-nin nüvə nəzarət orqanını İranın nüvə obyektlərinə edilən hücumları pisləməməkdə ittiham edib və bu susqunluğun agentliyin etibarını sarsıtdığını bildirib.
“BMT-nin nüvə nəzarəti orqanı İranın nüvə obyektlərinə edilən hücumları pisləməkdən çəkinir”, — deyə Bəqai vurğulayıb.
Qeyd edək ki, BAEA-nın baş direktoru Rafael Qrossi iyunun 29-da bildirib ki, Vaşinqtonun son hava hücumlarının Tehranın nüvə imkanlarını əhəmiyyətli dərəcədə zəiflətdiyinə dair iddialarına baxmayaraq İran aylar ərzində uranın zənginləşdirilməsi fəaliyyətlərini bərpa edə bilər.
R.Qrossi Fordo, Natanz və İsfahanındakı əsas obyektlərə fiziki ziyan dəydiyini etiraf edib, lakin İranın elmi və texniki biliklərinin toxunulmaz qaldığını vurğulayıb.
“Bu bilik məhv edilə bilməz. Sahib olduğunuz biliyi və bacarığı geri qaytara bilməzsiniz,” — deyə Rafael Qrossi bildirib.
O, həmçinin İranın hücumlardan əvvəl zənginləşdirilmiş uran ehtiyatını başqa yerə köçürməsi ilə bağlı yayılan xəbərlərdən narahatlığını ifadə edib.
“Bu materialın harada olduğu aydın deyil,” — deyə R.Qrossi qeyd edib.
