Səhiyyə mənbələrinin verdiyi məlumata görə, İsrailin Qəzzaya son hücumları nəticəsində daha 54 fələstinli həlak olub, onlarla insan yaralanıb.

Çərşənbə günü İsrailin Qəzzanın Tuffah məhəlləsindəki bir məktəbə endirdiyi hava zərbələri nəticəsində 16 nəfər həyatını itirib. Bildirilib ki, bir neçə nəfər hələ də dağıntılar altındadır..

Bu hücum, İsrailin bir gün əvvəl Qəzzanın mərkəzində yerləşən Bureyc qaçqın düşərgəsindəki məktəbə endirdiyi zərbələrdən sonra baş verib. Həmin hücum nəticəsində azı 33 nəfər ölüb, 73 nəfər isə yaralanıb.

Qəzzadakı hökumətin media ofisinin yaydığı məlumata əsasən, 2023-cü ilin oktyabr ayından bəri İsrail ordusu azı 234 sığınacağı hədəf alıb.

Digər bir səhiyyə mənbəsi Qəzzanın Vahda küçəsində yerləşən bazara edilən hücum nəticəsində azı 22 nəfərin öldüyünü bildirib. Məlumatda bildirilir ki, ölənlər arasında bir neçə uşaq və bir jurnalist də var. "Anadolu" agentliyinin müxbiri hücumun insanların ən sıx olduğu saatlarda həyata keçirildiyini qeyd edib.

Xan Yunis şəhərində bir evə endirilən növbəti zərbə nəticəsində biri uşaq olmaqla 8 nəfər həyatını itirib. Eyni bölgənin Beni Suheylə qəsəbəsində yerləşən başqa bir evə endirilən zərbə nəticəsində bir fələstinli və onun həyat yoldaşı həlak olub.

İsrail ordusu həmçinin Deyr əl-Bələhdəki Munasira qaçqın düşərgəsində biri uşaq olmaqla daha üç fələstinlini öldürüb. Qəzzanın şimalındakı Cəbəliyə qaçqın düşərgəsinin Tel əl-Zaatar məhəlləsindəki bir evə endirilən hava zərbəsi nəticəsində isə daha 3 nəfər ölüb, bir neçə nəfər yaralanıb.

Şahidlərin sözlərinə görə, İsrail ordusu mərkəzi yaşayış məntəqələrindən olan Nusairat qaçqın düşərgəsindəki bir neçə evi tamamilə söküb.

İsrailin 2023-cü il oktyabrın 7-dən etibarən Qəzzaya təşkil etdiyi hücum nəticəsində əksəriyyəti qadın və uşaqlar olmaqla 52.600-dən çox insan həyatını itirib.

2023-cü ilin noyabrında Beynəlxalq Cinayət Məhkəməsi İsrailin Baş naziri Benyamin Netanyahu və keçmiş müdafiə naziri Yoav Gallant barəsində Qəzzada hərbi cinayətlər və insanlığa qarşı cinayətlər törətmək ittihamı ilə həbs qərarı çıxarıb.

Bundan əlavə, İsrail yaşayış məntəqələrində apardığı müharibə səbəbilə Beynəlxalq Ədalət Məhkəməsində soyqırım işi ilə üz-üzədir.