Türkiyə prezidenti Rəcəb Tayyib Ərdoğan amerikalı həmkarı Donald Trampın Türkiyənin həssaslıqlarını nəzərə alan mövqeyini alqışladığını bildirib və əlavə edib ki, Suriya məsələsində də iki lider bir-birini yaxşı başa düşür.

“Dostum Tramp ilə birlikdə Türkiyə-ABŞ münasibətlərinə çox fərqli bir dinamika gətirəcəyimizə inanıram,” - deyə Ərdoğan İtaliyadan qayıdarkən qeyd edib.

Türkiyə prezidenti əlavə edib ki, amerikalı həmkarı Tramp ilə ilk fürsətdə üzbəüz görüşməyi planlaşdırır və onların telefon danışığının “çox səmimi, məhsuldar və dostcasına” keçdiyini vurğulayıb.

“İki ölkə arasındakı münasibətlər dərin köklərə malikdir. Müzakirə olunacaq çoxlu mövzular və atılacaq addımlar var. Buna görə də bizim nazirliklərimiz Türkiyə-ABŞ münasibətlərinin gedişatını müəyyən edəcək görüş üçün işlərini davam etdirirlər,” - deyə o əlavə edib.

Ərdoğan Türkiyənin Trampın Rusiya-Ukrayna müharibəsi ilə bağlı baxışını da dəstəklədiyini qeyd edib: “Suriya məsələsində iki lider olaraq bir-birimizi başa düşdüyümüzü görə bilirik. Əlbəttə, razılaşmadığımız sahələrdə məqbul kompromislər axtarmağa davam edəcəyik. Dialoq və diplomatiyanın müxtəlif dairələr tərəfindən risk kimi qəbul edilən məsələləri həll edə biləcəyinə inanırıq”.

İtaliya ilə əməkdaşlıq

İtaliya ilə ikitərəfli əlaqələrə toxunan Ərdoğan rəmi Ankara və Romanın yalnız müdafiə sənayesində deyil, həm də aviasiya və kosmos kimi yüksək texnologiya sahələrində əməkdaşlıq imkanlarını araşdırdıqlarını vurğulayıb. İki ölkə arasında qarşılıqlı texnologiya transferlərinin Türkiyənin yerli müdafiə sənayesini gücləndirəcəyini və İtaliyaya yeni perspektivlər və enerji təmin edəcəyini əlavə edib. Prezident bildirib ki, İtaliyanın Baş naziri Corcio Meloni və prezident Serjio Mattarella ilə görüşlərində rəsmi Ankaranın gözləntilərini, xüsusilə də Türkiyənin Avropa İttifaqına üzvlük müraciətinə konkret dəstək göstərilməsini ifadə edib. O, Türkiyənin Avropanın iqtisadi və hərbi təhlükəsizliyi üçün kritik əhəmiyyətini vurğulayıb: “Avropa təhlükəsizlik arxitekturasının intensiv müzakirə edildiyi bir dövrdə bu məsələ daha önəmlidir”.

Türkiyə və İtaliya bu məsələlərdə işlərini sıx koordinasiya ilə davam etdirmək barədə razılığa gəliblər. Görüşlərdə həmçinin regional və qlobal məsələlər müzakirə olunub. Ərdoğan İtaliyanın Qəzzada atəşkəsin bərpası, Fələstin dövlətinin tanınması və humanitar fəlakətin yüngülləşdirilməsi üçün “daha güclü dəstək” təmin edəcəyinə ümidvar olduğunu bildirib.

Türkiyənin Afrika ilə əməkdaşlığı

Ərdoğan bildirib ki, İtaliya Türkiyəyə Afrika ilə bağlı birgə addımlar atmaq təklifi verib. Rəsmi Ankara bu addımı Roma ilə birlikdə asanlıqla atar.

Türkiyənin Afrikaya yanaşmasının aydın olduğunu qeyd edən Ərdoğan ölkənin “qazan-qazan” yanaşmasını paylaşan Qərb ölkələri ilə Afrika qitəsində əməkdaşlıq sahələrini genişləndirməkdən məmnun olduğunu bildirib. “Bu baxımdan biz həmişə ikitərəfli və üçtərəfli əməkdaşlığa və tərəfdaşlıqlara açığıq,” - deyə o bildirib.

Müdafiə sənayesi

Ərdoğan qeyd edib ki, Türkiyə illər ərzində müdafiə sahəsində əhəmiyyətli irəliləyişlər əldə edib. Hava, quru və dəniz sursatları və avadanlıqları daxil olmaqla müdafiə sistemləri dünyada böyük maraqla izlənilir.

İtaliyanın müdafiə sektorundakı təcrübəsinə də toxunan Ərdoğan qarşılıqlı texnologiya transferinin Türkiyənin yerli müdafiə sənayesini gücləndirəcəyini və İtaliyaya yeni perspektivlər və enerji təmin edəcəyini bildirib. “Biz həmçinin Yunanıstan ilə münasibətlərimizi əməkdaşlıq, yaxşı qonşuluq əlaqələri, dostluq və müttəfiqlik əsasında irəlilətmək üçün səylər göstəririk,” - deyə o əlavə edib.

Rusiya-Ukrayna müharibəsi

Ərdoğan bildirib ki, rəsmi Ankara Rusiya ilə Ukrayna arasında elan edilən atəşkəsi daha da inkişaf etdirmək və genişləndirmək niyyətindədir, bu müvəqqəti atəşkəsin davamlı sülhə qapı açacağına inandığını söyləyib.

Rusiya ilə Ukrayna arasındakı müharibənin yalnız ədalətli və davamlı sülh yolu ilə sona çatacağını əvvəldən bəyan etdiklərini xatırladan Türkiyə prezidenti deyib: “Bu baxımdan heç vaxt ümidimizi itirməmişik. Hətta münaqişə daha da şiddətləndikdə belə tərəfləri danışıqlar masasına gətirdik və sülh danışıqları təklif etdik. Belə dövrlər təxribatlar və müdaxilələr üçün münbit şərait yaradır. Buna görə də prosesi zəhərləmək istəyənlərə imkan vermədən, həm Rusiya, həm də Ukrayna səmimi şəkildə sülhü müzakirə etməli və bu müharibə ən qısa zamanda sona çatmalıdır.

Bu müharibə yalnız iki ölkə üçün deyil, həm də qlobal təhlükəsizlik üçün əhəmiyyətlidir, çünki bu müharibə hər kəs üçün itkilərə səbəb olub. Ən böyük itkilər isə Rusiya və Ukrayna üçün olub. Ədalətli sülh isə heç kim üçün məğlubiyyət olmayacaq. Sülh prosesinin uzunmüddətli uğurlu olması üçün hər iki tərəf qarşılıqlı etimad qurmalıdır. Türkiyə olaraq biz sülhə töhfə verməyə və dəstək olmağa davam edəcəyik”.