Pakistan Kəraçi və Lahor kimi böyük şəhərlərin hava məkanının pozulmasından sonra Hindistanın 12 "Harop" növ pilotsuz uçuş aparatını düşürdüyünü bildirib.

Pakistan xəbərdarlıq edib ki, Hindistan təcavüzünə görə "ağır bədəl ödəməyə davam edəcək".

Pakistan ordusu bir gecədə Hindistanın 12 pilotsuz uçuş aparatını düşürdüyünü bildirib və Yeni Dehlini "aydın təcavüz aktı" ilə hava məkanını dəfələrlə pozmaqda ittiham edib.

Hərbi sözçü general-mayor Əhməd Şərif Çaudri bildirib ki, İsrail istehsalı "Harop" pilotsuz uçuş aparatları bir neçə bölgədə, xüsusən də Kəraçi və Lahor kimi böyük şəhər mərkəzlərinin yaxınlığında vurulub.

Hindistan son on ildə İsraildən radarlar, müşahidə və döyüş PUA-ları ilə raketlər də daxil olmaqla 2,9 milyard dollar dəyərində hərbi texnika idxal edib.

Pakistan ordusunun sözçüsü mətbuat konfransında deyib ki, təsiredici bütün nöqtələrdən, o cümlədən Kəraçi və Lahor şəhər sərhədlərindən dağıntılar yığılır.

Ordu Hindistanın son transsərhəd hücumlarından sonra dron hücumlarını davam etdirdiyini, lakin Pakistanın bunları "bir-bir zərərsizləşdirdiyini" bildirib.

Həmçinin pilotsuz uçuş aparatlarının insan tələfatı və ya infrastruktura ziyan vurduğunu təsdiqləməyib, lakin qalıqlar araşdırıldıqdan sonra əlavə məlumat veriləcəyini qeyd edib.