Aleksandr Darçiyev iki ölkə arasında danışıqların yeni mərhələsinin Moskvada keçiriləcəyini açıqlayıb.

TASS xəbər agentliyinə müsahibə verən Aleksandr Darçiyev bildirib ki, bu qərar hazırlıq xarakteri daşıyır və əsas məqsəd ikitərəfli diplomatik münasibətlərdə gərginliyə səbəb olan məsələlərin yumşaldılmasına diqqət yetirməkdir.

Rusiya nümayəndəsi danışıqların yaxın zamanda keçiriləcəyini də vurğulayıb.

"Rusiya və ABŞ arasında əlaqələrin normallaşması hələ vaxt tələb edir. Bu prosesə yalnız Ağ Evdəki müxalifət deyil, həm də Konqresdə mövcud olan və anti-Rusiya mövqeyi ilə seçilən 'şahinlər' mane olur", – deyə A.Darçiyev bildirib.

Fevralın 27-də və aprelin 10-da İstanbulda Rusiya və ABŞ səfirliklərinin fəaliyyətinin normallaşdırılması, eləcə də ikitərəfli münasibətlərdəki maneələrin aradan qaldırılmasına yönəlmiş məsləhətləşmələr keçirilib.

Rusiya nümayəndə heyətinə Aleksandr Darçiyev, ABŞ nümayəndə heyətinə isə dövlət katibinin Avropa və Avrasiya məsələləri üzrə köməkçisi Sonata Koulter rəhbərlik edib.

Birinci raunddan sonra rəsmi Vaşinqton Aleksandr Darçiyevin Rusiyanın ABŞ-dakı səfiri təyin olunmasına razılıq verib.

İkinci raundun yekununda isə hər iki tərəf diplomatik nümayəndəliklər üçün zəmanətli bank xidmətlərinin göstərilməsinə dair nota təqdim edib. Həmçinin diplomatlara vizaların verilməsi və onların mobilliyinin asanlaşdırılması məqsədilə əlavə tədbirlər barədə razılıq əldə olunub.

Aleksandr Darçiyevin sözlərinə görə, rəsmi Moskva ABŞ-da ələ keçirilmiş Rusiya diplomatik əmlakının tezliklə geri qaytarılmasını prioritet məsələ kimi diqqətə çatdırıb.