Nigeriyanın Benue əyalətinin Kvande bölgəsində silahlı şəxslərin kəndlərə hücumu nəticəsində azı 23 nəfər həyatını itirib, çox sayda insan yaralanıb.

Bölgə rəsmisi Ray Anumve yerli mətbuata açıqlamasında bildirib ki, hücumlar heyvandarlıqla məşğul olan Fulani çobanları tərəfindən həyata keçirilib. Onun sözlərinə görə, hücumlar zamanı aralarında uşaqların da olduğu 23 nəfər həlak olub, bir çox evlər yandırılıb və kəndlilərin ərzaq ehtiyatları talan edilib.

Benue əyalətində vaxtaşırı Fulani çobanları ilə əkinçilər arasında gərginlik və şiddətli toqquşmalar baş verir.

"AFP"nin məlumatına görə, şənbə gecəsi dörd kəndə dörd ayrı hücum həyata keçirilib. Benue ştatında fəaliyyət göstərən Qırmızı Xaç Komitəsinin katibi Entoni Abah agentliyə verdiyi açıqlamada, bölgədən alınan məlumatlara əsasən, müxtəlif hücumlardan sonra azı 23 nəfərin öldüyünü təsdiqləyib.

Onun məlumatına görə, Ukum bölgəsində 8 nəfər, Loqo bölgəsində 9 nəfər, Quma və Kvande bölgələrində isə hər birində 3 nəfər həyatını itirib. O, həmçinin hücumlar nəticəsində çox sayda insanın yaralandığını qeyd edib.

Hadisələrlə bağlı danışan polis sözçüsü hücumlardan xəbərsiz olduğunu bildirib.

Yaxınlıqdakı kəndə köçmüş dövlət elektrik şirkətinin təqaüdçü baş meneceri Cephas Kangeh isə AFP-yə açıqlamasında, pusquya düşən və motosikletləri oğurlanan bir cütlüyün də daxil olduğu üç nəfərin öldürüldüyünü eşitdiyini bildirib. Onun sözlərinə görə, həmin bölgədə çinli operatorlar qızıl mədənçiliyi ilə məşğuldur.

Cephas Kangeh deyib: “Hücumlar mədən ərazilərinin yaxınlığında baş verməyib. Lakin bu ərazilərdə fəaliyyət göstərən çinli mədənçilərə bir dəfə də olsun hücum edilmədiyi halda, yerli əhalinin davamlı olaraq hücuma məruz qalması və yaralanması insanda təəccüb doğurur”.

Ən son hücumların bəziləri, bir aydan çox əvvəl baş verən və azı 56 nəfərin ölümünə səbəb olan hücumların baş verdiyi ərazilərdə qeydə alınıb. Nigeriyanın Mərkəzi Kəmər bölgəsində belə hücumlar tez-tez dini və etnik xarakter daşıyır. Çünki bölgədəki bir çox çobanlar müsəlman Fulani etnik qrupuna, əkinçilər isə əsasən xristian icmalarına mənsubdur.

Aprelin əvvəlində qonşu Plateau əyalətində naməlum silahlı şəxslərin həyata keçirdiyi iki ayrı hücum nəticəsində 100-dən çox insan həyatını itirib. Benue də daxil olmaqla, daha geniş Mərkəzi Kəmər bölgəsində həm çobanlar, həm də fermerlər eyni torpaqlardan istifadə etməyə çalışırlar. Bu isə iqlim dəyişikliyinin yaratdığı təzyiqlər və əhali artımı fonunda məkan uğrunda ölümcül rəqabətə səbəb olur.