Afrika İttifaqı Sudanda paralel hökumətin elan edilməsinin iki ilə yaxın davam edən qarşıdurmalarla viran olmuş ölkəni bölmək riski daşıdığı barədə xəbərdarlıq edib.

Paramilitar Çevik Dəstək Qüvvələri ilə Sudan ordusu arasında baş verən münaqişə on minlərlə insanın ölümünə və 12 milyondan çox insanın məcburi köçkün vəziyyətinə düşməsinə səbəb olub. BMT bu vəziyyəti “Afrika qitəsində misli görünməmiş humanitar böhran” adlandırıb.

Müharibə Çevik Dəstək Qüvvələrinin orduya inteqrasiyası ilə bağlı yaranan fikir ayrılıqları fonunda başlamışdı. Bu vəziyyət ölkəni parçaladı. Sudan ordusu hazırda ölkənin şərq və şimal hissələrinə, Çevik Dəstək Qüvvələri isə qərbi Darfur və cənubun bəzi bölgələrinə nəzarət edir.

Keçən ay Çevik Dəstək Qüvvələri və müttəfiqləri arasında Nayrobidə paralel hökumətin yaradılmasına dair nizamnamə imzalanıb.

Afrika İttifaqı bu addımı qınayaraq, belə bir hərəkətin ölkənin bölünməsi riskini daşıdığını bəyan edib. AFP-nin məlumatına görə, imza atanlar, üsyançıların nəzarətində olan ərazilərdə “sülh və birlik hökuməti” qurmağı planlaşdırırlar.

Mart ayının əvvəlində Çevik Dəstək Qüvvələri və müttəfiqləri yenidən Nayrobidə bir araya gələrək “Keçid Konstitusiyası”nı imzaladılar.

Afrika İttifaqı bütün üzv dövlətlərə və beynəlxalq ictimaiyyətə Sudan Respublikasının ərazisinin və ya onun qurumlarının bir hissəsini idarə etmək məqsədilə yaradılan hər hansı hökuməti və ya paralel qurumu tanımamaları ilə bağlı çağırış edib. Afrika İttifaq həmçinin Sudan Respublikasında belə hökumətlərin yaradılmasını və ya paralel qurumları tanımadığını açıqlayıb.

Avropa İttifaqı isə çərşənbə axşamı yaydığı bəyanatında paralel hökumətin Sudan xalqının demokratik arzularını təhdid etdiyini bildirib.