ABŞ-ın vitse-prezidenti JD Vans Cənubi Asiya təhlükəli bir gərginliyin astanasında olduğuna görə məsuliyyət daşıyanların “tutulmasını və cəzalandırılmasını” təmin etmək üçün Pakistanı Hindistanla əməkdaşlığa çağırıb.
JD Vans deyib ki, Vaşinqton Hindistanın idarə etdiyi Kəşmirdə son hücuma cavabının daha geniş regional münaqişəyə gətirib çıxarmayacağına ümid edir.
Vans ABŞ-ın daha geniş regional münaqişənin qarşısını almaq istədiyini söyləyib.
Vans "Fox News" telekanalına verdiyi müsahibədə deyib: "Bizim ümidimiz ondan ibarətdir ki, Hindistanın bu terror hücumuna cavabı daha geniş regional münaqişəyə səbəb olmasın".
Vans bildirib ki, Vaşinqton Pakistanın hücuma görə məsuliyyət daşıyanları tutmaq üçün Hindistanla əməkdaşlıq edəcəyinə ümid edir.
"Və biz, sözün açığı, ümid edirik ki, Pakistan - bu işdə nə dərəcədə məsuliyyət daşıyırsa, - öz ərazisində vaxtaşırı fəaliyyət göstərən terrorçuların tutularaq cəzalandırılmasını təmin etmək üçün Hindistanla əməkdaşlıq edəcək. Bu prosesin belə inkişaf edəcəyinə ümid edirik. Əlbəttə, yaxın əlaqə saxlayırıq. Nə olacağını görəcəyik", -deyə o qeyd edib.
Gərginlik artır
Bu hadisə dövlətin nəzarətindəki mediaya görə, Pakistan ordusunun şərq qonşusu Hindistanla gərginliyin artması fonunda genişmiqyaslı hərbi təlimlər keçirməsindən bir gün sonra baş verib.
Pakistan radiosu mayın 1-də təhlükəsizlik mənbələrinə istinadən xəbər verib ki, hərbi təlimlər döyüş strategiyası çərçivəsində müasir silahların praktiki nümayişini əhatə edir, bu təlimlərdə zabit və əsgərlər fəal şəkildə peşəkar bacarıqlarını nümayiş etdirirlər.
Hindistan və Pakistan arasında münasibətlər son illərin ən aşağı səviyyəsinə düşüb. Yeni Dehlinin idarə etdiyi Kəşmirdə silahlı şəxslərin turistlərə qarşı ən dəhşətli hücumu həyata keçirərək 26 nəfəri öldürməsindən sonra Hindistan Pakistanı "transsərhəd terroru" dəstəkləməkdə ittiham edib.
İslamabad hücumda hər hansı əli olduğunu inkar edərək, Pakistanı onunla əlaqələndirmək səylərini “ciddi” adlandırıb və Hindistanın hər hansı mümkün hərəkətinə cavab verəcəyini vəd edib.
ABŞ dövlət katibi Marko Rubio aprelin 30-da Cənubi Asiyada gərginliyi azaltmağa çağırıb.
Birləşmiş Millətlər Təşkilatı da iki ölkəni "maksimum təmkin" göstərməyə çağırıb və məsələlərin "mənalı qarşılıqlı əlaqə və sülh yolu ilə həll edilməli olduğunu" vurğulayıb.
Kəşmir məsələsi
Pahalqam hücumundan sonra hər iki tərəf bir sıra cavab tədbirləri həyata keçirdi.
Hindistan Pakistanla həyati əhəmiyyət kəsb edən su mübadiləsi sazişini dayandırdı və quruda fəaliyyət göstərən yenganə sərhəd keçid məntəqəsini bağladı. Həmçinin aprelin 27-dən etibarən Pakistan vətəndaşlarına verilən vizaları ləğv etdi.
Buna cavab olaraq Pakistan Hindistan vətəndaşları üçün vizaları ləğv etdi, hava məkanını Hindistan aviaşirkətləri üçün bağladı, qonşusu ilə ticarəti dayandırdı və Hindistanla Simla sazişini təxirə saldı. 1972-ci ildə imzalanmış bu saziş sülhü bərqərar etmək və xüsusilə Kəşmir məsələsinə diqqət yetirməklə ikitərəfli vasitələrlə mübahisələri həll etmək məqsədi daşıyırdı.
Hindistan və Pakistan 1947-ci ildə Britaniya hökmranlığından müstəqillik əldə etdikdən sonra keçmiş knyazlıq olan bu torpaq parçası uğrunda vuruşdular. Sərhəd nəsillər boyu ailələri ayırıb.
Hindistanın idarə etdiyi bölgədə üsyançılar 1989-cu ildən müstəqillik və ya Pakistanla birləşmək tələbi ilə silahlı müqavimət göstərirlər.
Yeni Dehli hökuməti müsəlmanların çoxluq təşkil etdiyi Hindistanın nəzarətində olan Kəşmir bölgəsinə 500 minə yaxın hərbçi yerləşdirib.
Son həftələrdə Modi hökuməti müsəlman təşkilatlarına, nəşrlərinə və məktəblərə qarşı təzyiqlərini artıraraq bölgədə iğtişaşlara səbəb olub.
Eyni zamanda, Hindistan mübahisəli ərazidə kəşmirli olmayanlara 82.000 yaşayış yeri sertifikatı verib. Bu, qəsdən demoqrafik dəyişikliklə bağlı narahatlıqları artırıb.
Pahalqam hücumundan sonra Hindistanın idarə etdiyi Kəşmirdə 1500-dən çox insan saxlanılıb.
Digər tərəfdən, Hindistanın müxtəlif şəhərlərində əksəriyyəti tələbələr olan Kəşmirli müsəlmanların Hindu sağçı qruplar tərəfindən hücuma məruz qalması ilə bağlı xəbərlər yayılıb.
