İyunun 17-də yayılan bəyanatda İran İnqilab Keşikçiləri Qvardiyasının (SEPAH) “Xatəmül Ənbiya” qoşununun mərkəzi qərargahının rəisi general Əli Şadmaninin İsrailin hücumu nəticəsində öldüyü bildirilib.

Şadmani bu vəzifəyə bir neçə gün əvvəl İranın ali dini lideri Ayətullah Əli Xamenei tərəfindən təyin edilmişdi.

“Kəşfiyyat İdarəsi tərəfindən əldə edilən dəqiq kəşfiyyat məlumatı və gecə saatlarında yaranan qəfil fürsətdən sonra Hərbi Hava Qüvvələrinə məxsus qırıcı təyyarələr Tehranın mərkəzində yerləşən qərargahlara hücum edərək Baş Qərargah rəisi və ən yüksək səviyyəli hərbi komandir Əli Şadmanini zərərsizləşdirib”, - İsrail ordusu "X" hesabında bildirib.

Şadmaninin vəzifələrinə döyüş əməliyyatlarına nəzarət etmək, raket və dron hücumlarını təsdiqləmək və İranın İsrailə qarşı hərbi strategiyasını formalaşdırmaq daxildir.

Şadmani ötən həftə İsrailin hücumu zamanı öldürülən general-leytenant Qulaməli Rəşiddən vəzifəni təhvil alıb.

"Şadmaninin zərərsizləşdirilməsi İranın ali hərbi komandanlığını hədəf alan bir sıra əməliyyatların bir hissəsidir və İran silahlı qüvvələrinin komandanlıq zəncirinə növbəti zərbədir", -deyə İsrail ordusu bildirib.

İsrail rəsmiləri əməliyyatla bağlı əlavə təfərrüat verməyib, Tehran isə hələ Şadmaninin ölümü ilə bağlı açıqlama yaymayıb.