Hindistan, Polşa və Macarıstan iyunun 25-ində 40 ildən çox müddətdən sonra ilk astronavtlarını Beynəlxalq Kosmik Stansiyaya göndərərək xüsusi uçuş həyata keçiriblər.

  “SpaceX”in “Falcon” raketi NASA-nın Kennedi Kosmik Mərkəzindən stansiyada sızma ilə bağlı narahatlıqlarla əlaqədar iki həftəlik gecikmədən sonra havaya qalxıb.

  “SpaceX”in məlumatına görə, heyət Kosmik Mərkəzdəki missiyası zamanı Yer müşahidəsi, bioloji araşdırmalar və materiallar sahəsində 60-dan çox elmi təcrübə və texnologiya tədqiqatları həyata keçirəcək.

  Üç ölkə iki həftəlik missiyanın xərclərini bölüşüb. “Houston” mərkəzli “Axiom Space” şirkəti bu razılaşmanı təşkil edib və hər bir müştəri üçün bilet qiyməti 65 milyon dollardan çox təyin olunub.

  NASA-nın “X” platformasında verdiyi açıqlamaya görə, heyət iyunun 26-da Beynəlxalq Kosmik Stansiyaya çatacaq.

  “Texniki problemlər və əlverişsiz hava şəraiti səbəbindən gecikən bu missiya Hindistan üçün mühüm mərhələdir. Çünki qrup kapitanı Şubhanşu Şukla Beynəlxalq Kosmik Stansiyaya gedən ilk hindistanlı olacaq”, - deyə Hindistan Baş naziri Narendra Modi “X” platformasında paylaşıb.

  Missiyaya NASA astronavtı və hazırda “Axiom Space”də İnsanlı Kosmik Uçuşlar direktoru olan Peqqi Vitson (Peggy Whitson) rəhbərlik edir. Komandanın digər iki mütəxəssis üzvü isə Avropa Kosmik Agentliyinin layihə astronavtı, polyak Slavosz Uznanski-Visnyevski və macar Tibor Kapudur.