Tayvan prezidenti Lay Tsin-de çərşənbə axşamı verdiyi açıqlamada Çinlə dialoq aparmaq istədiyini bildirib və müharibədə qalibin olmadığını vurğulayıb. O, həmçinin hökumətin adanın müdafiəsini gücləndirməyə davam etməli olduğunu qeyd edib.

Çin isə Lay Tsin-deni “separatçı” adlandıraraq indiyədək bir neçə dialoq təklifini rədd edib. Tayvan prezidenti Çinin demokratik və müstəqil şəkildə idarə olunan ada üzərində suverenlik iddialarını rədd edərək, Tayvanın gələcəyinə yalnız Tayvan xalqının qərar verə biləcəyini bildirib.

Prezident ofisində jurnalistlərə açıqlama verən Lay Tsin-de Tayvan xalqının sülhü sevdiyini ifadə edərək "Mən də sülhə sadiqəm, çünki sülh qiymətsizdir" deyib.

O, Tayvanın müdafiəsini gücləndirməyə davam edəcəyini, çünki müharibəyə hazırlaşmağın müharibənin qarşısını almağın ən yaxşı yolu olduğunu vurğulayıb. Lay Tsin-de həmçinin deyib: "Bir daha təkrar edirəm. Tayvan Çinlə qarşılıqlı hörmət əsasında mübadilə və əməkdaşlığa açıqdır. Mühasirəni mübadilə, qarşıdurmanı isə dialoqla əvəz etmək istəyirik."

Çin Müdafiə Nazirliyi Lay Tsin-deni "Tayvan boğazında yaşanan böhranın səbəbkarı" adlandırıb, onun düşmənçiliyi artırdığını və sülhlə sabitliyi pozduğunu bildirib.

Xatırladaq ki, Çin keçən ay Tayvan ətrafında "Strait Thunder-2025A" adlı hərbi təlimlər keçirib. Təlimin adındakı “A” hərfi gələcəkdə oxşar məşqlərin keçirilə biləcəyini göstərir.