Böyük Britaniyanın Baş naziri Keir Starmerin ölkənin süni intellekt imkanlarını artırmaq strategiyası, mərkəzi ABŞ-da yerləşən Stargate layihəsinin diqqətini çəkib.

"Financial Times"ın cümə axşamı yayımladığı məlumata görə, SoftBank, OpenAI və Oracle tərəfindən maliyyələşdirilən 500 milyard dollar dəyərindəki Stargate layihəsi, xaricdə süni intellekt infrastrukturunu genişləndirmək məqsədilə Böyük Britaniyaya sərmayə qoymağı qiymətləndirir.

Böyük Britaniyanın Baş naziri Keir Starmer ölkəni süni intellekt sahəsində dünya liderinə çevirmək məqsədilə, tənzimləmədə yenilikçi yanaşmalar tətbiq edəcəyini, ictimai məlumatları tədqiqatçılara təqdim edəcəyini və məlumat mərkəzlərinə xüsusi zonalar ayıracağını vəd edib.

Məsələ ilə tanış olan mənbələrə istinadən məlumat verən qəzet, layihənin məlumat mərkəzlərinin elektrik enerjisinə çıxışını artırmağa yönəldiyini və Almaniya ilə Fransanın da potensial namizədlər kimi nəzərdən keçirildiyini bildirib.

OpenAI, Oracle və SoftBank, Reutersin şərh tələblərinə cavab verməyiblər.

OpenAI-nin icraçı direktoru Sam Altman bu ilin fevral ayında Avropaya Stargate-ə bənzər süni intellekt proqramı gətirməkdə maraqlı olduqlarını və “Stargate Europe” ideyasına açıq olduqlarını bildirib. Son illərdə OpenAI London, Paris, Brüssel və Münhen şəhərlərində ofislər açaraq Avropadakı fəaliyyət sahəsini əhəmiyyətli dərəcədə genişləndirib.

ABŞ prezidenti Donald Tramp isə yanvar ayında Stargate layihəsini özəl sektor investisiyası kimi elan etmiş və bu təşəbbüsün süni intellekt infrastrukturunu maliyyələşdirmək, eyni zamanda ABŞ-ı rəqib ölkələrdən üstün mövqeyə gətirmək məqsədi daşıdığını qeyd etmişdi.

Çatbotların sürətlə yayılması və qabaqcıl süni intellekt agentlərinin meydana çıxması, son illərdə investorların bu sahəyə marağını xeyli artırıb.