ABŞ prezidenti Donald Tramp Vatikanda Ukrayna prezidenti ilə görüşdən bir gün sonra Rusiya prezidenti Vladimir Putinin Ukraynada “müharibəni dayandırmasını” və sülh sazişi imzalamasını istədiyini bildirib.

Qeyd edək ki, Tramp vəzifəsinin icrasına başlamadan əvvəl Rusiya-Ukrayna müharibəsini bir gündə dayandıra biləcəyini iddia etmişdi. Lakin onun vəzifəyə gəldikdən sonra münaqişələrə son qoymaq üçün başlatdığı diplomatik səylər indiyədək heç bir nəticə verməyib.

Tramp aprelin 27-də Romada Papa Fransiskin dəfn mərasimində iştirak etdikdən sonra Vaşinqtona getmək üçün Morristovn hava limanında təyyarəyə minməzdən əvvəl jurnalistlərin Ukrayna müharibəsi ilə bağlı suallarına “Mən ondan (Putindən) atəşi dayandırmasını, oturub müqavilə imzalamasını istəyirəm” deyərək cavab verib.

Tramp həmçinin “Bizim müqavilə çərçivəmiz var, mən buna inanıram və onun imzalamasını istəyirəm” deyərək, onun nəzərdə tutduğu razılaşmanın ABŞ-ın Ukraynada üç ildən artıqdır davam edən münaqişə ilə bağlı təklif etdiyi sülh planı ola biləcəyi iddia edilib.

Tramp Ukrayna prezidenti Volodimir Zelenski ilə dəfn mərasimində görüşüb. Bu, iki liderin fevralda Ağ Evdə baş tutan uğursuz görüşündən sonra ilk üz-üzə görüşü idi.

Tramp Müqəddəs Pyotr Bazilikasında qısa görüşdükdən sonra Putinin Ukraynanın şərqində ciddi dağıntılara və on minlərlə insanın ölümünə səbəb olan müharibəni bitirmək niyyətinə şübhə etdiyini bildirib.

Tramp həmçinin aprelin 27-də 2014-cü ildə Rusiya tərəfindən ilhaq edilmiş Qara dəniz yarımadası olan Krımla bağlı suala “Zənnimcə elədir” deyərək Zelenskinin bu ərazini “verməyə” hazır olduğunu deyib.