İran ABŞ ilə razılaşma çərçivəsində yüksək zənginləşdirilmiş uran istehsalından imtina edə bilər, Xameneinin köməkçisi NBC-yə bildirib. Ölkənin Ali dini rəhbəri Əli Xameneyinin məsləhətçisi Əli Şəmxani deyir ki, rəsmi Tehran şərtlər yerinə yetirildikdə razılaşmanı imzalaya bilər.
İran ABŞ ilə iqtisadi sanksiyaların ləğvi müqabilində razılaşma əldə etməyə hazırdır, bunu İran rəsmisi “NBC News”a verdiyi müsahibədə bildirib.
Əli Şəmxani İranın Ali rəhbəri Ayətullah Əli Xameneinin müşaviri İranın heç vaxt nüvə silahı istehsal etməyəcəyinə dair öhdəlik götürəcəyini, yüksək zənginləşdirilmiş uran ehtiyatlarından imtina edəcəyini, yalnız mülki istifadə üçün lazım olan aşağı səviyyələrdə uranı zənginləşdirəcəyini və beynəlxalq müfəttişlərin prosesi nəzarət etməsinə icazə verəcəyini bildirib. Bu barədə mayın 13-də ABŞ yayımçısı məlumat verib.
Şəmxani müəyyən şərtlər yerinə yetirildiyi təqdirdə İranın dərhal bir razılaşma imzalamağa hazır olduğunu təsdiqləyib: "Hələ də mümkündür. Əgər amerikalılar dedikləri kimi hərəkət etsələr, əlbəttə, daha yaxşı münasibətlərimiz ola bilər. Bu, yaxın gələcəkdə daha yaxşı bir vəziyyətə gətirib çıxara bilər."
Barış əli, yoxsa tikanlı məftil?
Əli Şəmxaninin bu açıqlamaları Donald Trampın 13 mayda İranı “Yaxın Şərqdə ən dağıdıcı qüvvə" adlandırmasından sonra gəldi. Tramp regionda qeyri-sabitliyə görə rəsmi Tehranı günahlandıraraq ABŞ-ın İranın heç vaxt nüvə silahı əldə etməsinə icazə verməyəcəyini xəbərdar edib və “İran seçməlidir: xaos və terror, yoxsa sülh?.. Mən İranla razılaşma əldə etmək istəyirəm. Amma əgər rəsmi Tehran barış əlini rədd edərsə, bizim başqa seçimimiz qalmayacaq və maksimum təzyiq tətbiq edəcəyik", - deyib.
Səudiyyə Ərəbistanının paytaxtı Riyadda keçirilən investisiya sammitində çıxışı zaman Tramp onu da vurğulayıb ki, "İran heç vaxt nüvə silahına sahib olmayacaq, yoxsa razılaşma təklifi heç vaxt mümkün olmaz”.
Əli Şəmxani NBC ilə müsahibəsində Trampın tonu və davam edən təhdidlərindən narazılığını ifadə edib: "O, barış əlindən danışır, amma biz bunu görmürük, hamısı tikanlı məftildir".
