Türkiyə Prezidenti Rəcəb Tayyib Ərdoğan Avropa, Yaxın Şərq və Şimali Afrikanı əhatə edən bir sıra diplomatik və strateji inkişafların mərkəzində yer aldı.
Ukrayna, Rusiya və ABŞ arasında aparılan danışıqlardan tutmuş, PKK terror təşkilatının özünü ləğv etməsinə qədər Türkiyə yalnız regional nüfuzunu deyil, həm də qlobal güc vasitəçisi olaraq artan rolunu nümayiş etdirdi.
İstanbulda Ukrayna–Rusiya–ABŞ sülh danışıqları
Həftənin ən diqqətçəkən hadisəsi Ukrayna, Rusiya və ABŞ-ın yüksək səviyyəli nümayəndələrinin Ukraynadakı münaqişəyə son qoymaq məqsədilə İstanbulda görüşəcəklərinin elan edilməsi oldu.
Hələlik atəşkəs elan edilməsə də, Türkiyədə yüksək səviyyəli danışıqların keçirilməsi qərarı, Ankaranın müharibənin ilk günlərindən Şərq və Qərb arasında neytral vasitəçi kimi qazandığı etibarı bir daha vurğuladı.
Çərşənbə axşamı Ukraynanın paytaxtı Kiyevdə jurnalistlərə açıqlama verən Volodimir Zelenski cümə axşamı Ankarada prezident Rəcəb Tayyib Ərdoğanla görüşəcəyini və orada Rusiya prezidenti Vladimir Putinin gəlişini gözləyəcəklərini bildirib. Rusiya lideri görüşdə iştirak etmək qərarına gələrsə, ABŞ rəsmiləri prezident Donald Trampın da İstanbulda keçiriləcək sülh danışıqlarına qatılacağını qeyd ediblər.
Bundan əlavə, NATO-nun baş katibi Mark Rutte Türkiyəyə gələrək mayın 14-15-də Antalyada keçiriləcək NATO Xarici İşlər Nazirlərinin qeyri-rəsmi toplantısından əvvəl prezident Rəcəb Tayyib Ərdoğan və xarici işlər naziri Hakan Fidanla görüşüb. M.Ruttenin səfərində əsas diqqət Ukrayna sülh danışıqlarına yönəlib.
Terror təşkilatı PKK özünü ləğv etdi
Türkiyənin milli təhlükəsizlik baxımından ən mühüm uğurlarından biri bazar ertəsi günü PKK terror təşkilatının özünü ləğv edərək silahlarını yerə qoyduğunu rəsmən elan etməsi oldu. Bu, Türkiyənin illərdir davam edən terrorla mübarizə kampaniyasında tarixi bir dönüş nöqtəsi olaraq qiymətləndirildi.
Terror təşkilatının özünü buraxması, Türkiyənin uğurlu hərbi modernizasiya strategiyası, milli imkanlarla istehsal edilən dronlar vasitəsilə genişlənmiş müşahidə və cənub-şərq vilayətlərində iqtisadi və sosial sərmayələrin birləşməsi ilə əlaqələndirilir. Bu inkişaf Qərb hökumətləri tərəfindən sükutla qarşılanmış, lakin Türkiyədə sülh və sabitliyin böyük bir zəfəri kimi qeyd olunmuşdur.
ABŞ Suriyaya tətbiq etdiyi sanksiyaları ləğv edir
Çərşənbə axşamı ABŞ prezidenti Donald Tramp Türkiyə Prezidenti Rəcəb Tayyib Ərdoğanla görüşündən sonra ABŞ-ın Suriyaya tətbiq etdiyi bütün sanksiyaları ləğv edəcəyini açıqlayıb. Əgər bu addım həyata keçirilərsə, Suriyanın yenidən qurulması səylərinə və regional inteqrasiyaya yeni imkanlar yaradacaq, eyni zamanda Türkiyəyə cənub qonşusunun sabitləşməsi və yenidən qurulmasında mərkəzi rol oynamağa şərait yaradacaq.
Bu inkişaf, Türkiyənin ABŞ və Suriyalı tərəfmüqabillər arasında bölgədə gərginliyin azaldılması və humanitar böhranların yumşaldılmasına yönəlmiş gizli danışıqlara ev sahibliyi etməsi ilə bağlı hesabatlardan sonra baş verib.
İran və Avropa rəsmiləri, Ankarada nüvə gərginliyinin azaldılması və ticarətin normallaşdırılması ilə bağlı dayanmış danışıqlara yenidən başlamaq üçün görüşdükdən sonra, Türkiyənin diplomatik tarazlıq siyasəti daha da genişləndi. İran, İngiltərə, Fransa və Almaniya nümayəndə heyətləri arasında danışıqların cümə günü İstanbulda keçiriləcəyi bildirilib.
Təfərrüatlar hələlik aydın olmasa da, Türkiyənin ev sahibi kimi seçilməsi, onun mürəkkəb danışıqlarda qərəzsizlik və etibarlılıq anlayışını açıq şəkildə nümayiş etdirir. Simvolik bir jest olaraq, Fələstinin müqavimət hərəkatı ''Həmas'' və Pakistan hökuməti, Yaxın Şərq və Cənubi Asiyadakı gərginlik fonunda humanitar dəhlizlərin və atəşkəs danışıqlarının asanlaşdırılmasına verdikləri töhfələrə görə Prezident Rəcəb Tayyib Ərdoğana təşəkkür edən bəyanatlar yayıb.
Liviyada sabitlik təmin olundu
Liviyanın BMT tərəfindən tanınan baş naziri Əbdülhəmid Dibeybe daxili müxalifəti sıxışdıraraq öz siyasi nüfuzunu möhkəmləndirdi. Bu inkişaf, Liviyanın münaqişədən sonrakı siyasi mənzərəsinin formalaşmasında Türkiyənin təsirini bir daha təsdiqləyir. Qeyd edək ki, rəsmi Ankara bu ölkəyə həm diplomatiya, həm də müdafiə sahəsində böyük sərmayələr yatırıb.
