Suriyanın yeni hökumətinin elan edilməsi üçün təşkil olunan mərasim Əhməd əş-Şəraanın hökumətin hesabatlılıq və şəffaflığa əsaslanan dövlət qurumlarını yenidən qurmağa çalışacağını vəd etməsi ilə başladı. Əhməd əş-Şəraa şənbə günü Dəməşqdəki Prezident İqamətgahında keçirilən mərasimdə deyib: "Ölkəmiz daha yaxşı gələcəyə doğru yolunda yeni tarixi dövrə qədəm qoyur. Biz yenidənqurma işləri ilə məşğul olacağıq və islahatlar keçirəcək quruculuq və dəyişiklik hökumətinin formalaşdırılmasını elan edirik. Bu hökumət təhsil və səhiyyə xidmətlərində yeni üfüqlər açmağa çalışacaq və biz korrupsiyanın qurumlarımıza sızmasına imkan verməyəcəyik. Hökumət dövlət qurumlarını hesabatlılıq və şəffaflıq əsasında yenidən quracaq."

Yeni hökumət 22 nazirdən ibarətdir, onlardan biri qadındır. Belə ki, Murhaf Əbu Kasra müdafiə naziri, Enes Hattab daxili işlər naziri, Əsəd əş-Şeybani xarici işlər naziri, Məzhar Əl-Veys ədliyyə naziri, Mərvan əl-Hələbi təhsil naziri, Hind Kabavat sosial işlər və əmək naziri və Məhəmməd Əbu əl-Xeyr Şükri vəqflər naziri, Həmzə Mustafa informasiya naziri, Yarub Bədr nəqliyyat naziri, Məhəmməd Eskaf inzibati inkişaf naziri, Mazen əl-Salhani turizm naziri, Məhəmməd Sameh Hamad gənclər və idman naziri, Məhəmməd Saleh mədəniyyət naziri, Mustafa Əbdül Razaq ictimai işlər və mənzil naziri vəzifəsini icra edəcək.

Təhsil Nazirliyinə Məhəmməd Əbdül Rəhman Türko rəhbərlik edəcək, Amcad Bədr isə kənd təsərrüfatı naziri təyin edilib. Əbdül Salam Haykal rabitə və informasiya texnologiyaları naziri, Raed əl-Saleh isə fövqəladə hallar və təbii fəlakətlərin idarə olunması naziri təyin olunub.

Bundan əlavə, Məhəmməd Ancerrani yerli idarəetmə naziri, Musab Nezzal əl-Əli səhiyyə naziri, Nidal əl-Şaar iqtisadiyyat naziri, Mohamed Yusr Barniye maliyyə naziri, Məhəmməd əl-Bəşir isə energetika naziri vəzifəsini icra edəcək.

“Anadolu” agentliyinin müxbirinin verdiyi məlumata görə, nazirlər and içərək vəzifələrinin icrasına başlayıblar.