Atom Enerjisi üzrə Beynəlxalq Agentliyin (AEBA) Baş direktoru Rafael Mariano Qrossi ABŞ-ın İran ərazisindəki nüvə obyektlərinə endirdiyi son hava zərbələrinin ardından iyunun 22-dә (bu gün) “X” platformasında paylaşdığı açıqlamada agentliyin idarə heyətini təcili toplantıya çağırıb.

Bu açıqlama, ABŞ qüvvələrinin Fordo daxil olmaqla İranın üç əsas nüvə obyektinə hücum etdiyi barədə xəbərlərin ardınca gəlib.

AEBA-nın ayrı bir bəyanatında isә deyilir: “Fordo da daxil olmaqla İranın üç nüvə obyektinə yönəlmiş hücumlardan sonra hazırkı mərhələdə obyektlər ətrafında radiasiya səviyyəsində artım qeydə alınmayıb. İranda mövcud vəziyyətlə bağlı əlavə məlumatlar daxil olduqca yeni qiymətləndirmələr təqdim ediləcək.”

Qeyd edәk ki, rәsmi Tehran ABŞ-ın hücumlarına dair beynəlxalq səviyyədə araşdırma aparılmasını tələb edib.

İranın “SNN” xəbər agentliyinin məlumatına görə, İran Atom Enerjisi Təşkilatının (İAET) rəhbəri Mohammad Eslami Rafael Qrossiyə ünvanladığı məktubda agentliyi rәsmi Vaşinqtonun bu hərəkətlərini qınamağa və uyğun tədbirlər görməyə çağırıb.

M.Eslami həmçinin R.M.Qrossini hərəkətsizlik və əməkdaşlığa laqeyd yanaşmaqda günahlandıraraq İranın bu məsələ ilə bağlı hüquqi prosedurları işə salacağını bildirib.

NSYM-dәn çıxma ehtimalı

Eyni zamanda, İran parlamentinin deputatı ABŞ-ın hücumlarına cavab olaraq rәsmi Tehranın Nüvə Silahlarının Yayılmaması Müqaviləsindən (NSYM) çıxmaq ehtimalı barədə xəbərdarlıq edib.

İran parlamentinin Xarici Siyasәt Komissiyasının sədri Abbas Qolru “X” platformasında yaydığı açıqlamada NSYM-nin fövqəladə hallarda tərəf dövlətlərə müqavilədən çıxmaq hüququ verdiyini xatırladıb.